Atrás PDF
Sr. portavoz:
Uviéu, 25/07/08
La
nuesa Asociación de Xuristes (Aconceyamientu de Xuristes pol Asturianu), ta
dafechu comprometida na salvaguarda’l nuesu patrimoniu llingüísticu y na
defensa los derechos de los falantes d’asturianu y de gallego-asturianu.
Como
sabrá, nestos momentos tamos asistiendo na Xunta Xeneral del Principáu a los
trabayos previos (Ponencia de Reforma), pa sacar alantre la nueva reforma
l’Estatutu d’Autonomía d’Asturies.
Cuidamos
que nesa reforma’l Llexislador habrá respetar el derechu fonderu de los
ciudadanos asturianos al usu de la so propia llingua rexonal en tolos ámbitos
de la vida pública y privada, conforme a llei, según lo afitao na propia
Constitución Española y nos Trataos Internacionales de los qu’España ye
parte (sobre too, de la Carta Europea de les Llingües Rexonales o Minoritaries
del Conseyu d’Europa).
Poro,
camentamos que l’alderique sobre l’acatamientu a lo mandao pola Constitución
Española (artículu 3.2), reconociendo nel Estatutu d’Autonomía’l calter
oficial n’Asturies de la llingua propia xunta’l castellán, habría
perfacese dende la racionalidá y cuntando siempre col máximu respetu pa colos
derechos ciudadanos.
Sicasí,
asistimos preocupaos a la necia posición de desacatu llegal y constitucional
caltenida polos dirixentes de los partíos mayoritarios n’Asturies (FSA-PSOE y
PP), negando la reconocencia la condición d’oficialidá de la llingua propia
nel Estatutu, tal y como asina espeya la so pautada propuesta de redaición
d’artículu 4.
Más
allá de les particulares estratexes negociadores y de los intereses
partidistes, entendemos que l’actitú d’unos dirixentes políticos
responsables, nun puede nunca trespasar la llende del respetu a lo afitao nel
nuesu ordenamientu xurídicu, na nuesa Llei Fundamental, atacando los derechos
fonderos de los ciudadanos reconocíos a nivel internacional. Sobre too, si esos
dirixentes políticos pertenecen a los dos partíos mayoritarios n’España.
El
ricu patrimoniu llingüísticu asturianu tá en peligru real de desaniciu (asina
lo reconoció apocayá la UNESCO) y dende la nuesa Asociación entendemos que
nesti Estáu de Derechu los ciudadanos asturianos nun podemos seguir siendo
trataos en condiciones de desigualdá en comparanza colos otros ciudadanos españoles
con llingua propia, vulnerando d’esta miente’l principiu d’igualdá (artículos
1.1, 9.2 y 14 de la Constitución).
Por too ello, axuntámos-y abonda documentación xurídica y sociollingüística sobre la custión, cola esperanza de que pueda conocer la mesma ya interceder na medida les sos posibilidaes pa que, llegáu'l casu, facer porque n’Asturies impere la llei y el respetu a los derechos fonderos. De nun incorporase a la fin nel Proyeutu d’Estatutu asturianu la reconocencia espresa del calter oficial de la llingua propia xunta’l castellán acatando lo afitao na Constitución Española (artículu 3.2), solicitámos-y proceda a mandar introducir nel citáu Proteutu les enmiendes afayadices pa qu’ello seya asina o, si non, refugar votando a la escontra d’una Llei Orgánica viciada d’un pergrave elementu dicriminatoriu y anticonstitucional, al nun respetar los derechos fonderos de los ciudadanos falantes d’esta llingua. Otra manera, veríemonos na necesidá de demandá-y al so Grupu la interposición del oportunu Recursu d’Inconstitucionalidá, conforme lo dimpuesto nel artículu 32.1 de la Llei Orgánica del Tribunal Constitucional.
Aguardando
la so pronta rempuesta a la presente, reciba un saludu cordial. Atentamente,
Xosé
Mª Estrada Janáriz
Presidente
l’Aconceyamientu de Xuristes pol Asturianu
ANEXOS.
Documentación que s’axunta:
-
Informe sobre la llingua asturiana (Academia de la Llingua Asturiana, 2002)
- Informe sobre la fala o gallego-asturiano (Academia de la Llingua Asturiana,
2006)
- Informe sobre la represión y non reconocencia de los derechos lingüísticos
n’Asturies (Academia de la Llingua Asturiana, 2002)
- The Asturian language in education in Spain (Mercator-Education, 2002)
- I Informe-Denuncia al Comité Européu pa les Llingües Rexonales o Minoritaries
del Conseyu d’Europa: Dictame xurídicu sobre’l conflictu llingüísticu
n’Asturies (AXA, 2007)
- II Informe-Denuncia al Comité Européu pa les Llingües Rexonales o
Minoritaries del Conseyu d’Europa: Dictame xurídicu sobre la llingua
asturiana na enseñanza (AXA, 2007)
- III Informe-Denuncia al Comité Européu pa les Llingües Rexonales o
Minoritaries del Conseyu d’Europa: L’agonía d’una llingua europea (AXA,
2007)
- IV Informe-Denuncia al Comité Européu pa les Llingües Rexonales o
Minoritaries del Conseyu d’Europa (AXA, 2008)
- Propuesta de redaición del Artículu 4 del Estatutu d’Autonomía d’Asturies
fecha pola Ponencia de Reforma Estatutaria (PSOE-PP), negándo-yos la
reconocencia de cooficialidá a la llingua asturiana y al gallego-asturianu nel
so ámbitu, nun reconociendo el calter d’estes llingües como patrimonios
culturales vivos y, al empar, medios d’espresión d’una comunidá llingüística
con trescendencia pública, tal y como asina lo afita la nuesa doctrina
xurisprudencial.
- Propuesta de redaición del Artículu 4 del Estatutu d’Autonomía d’Asturies
recoyendo la reconocencia de cooficialidá ensin obligatoriedá de la llingua
asturiana y del gallego-asturianu nel so ámbitu, fecha pol Conceyu Abiertu pola
Oficialidá, plataforma independiente qu’axunta a más de 250 organizaciones
civiles y culturales asturianes.
I
Propuesta de redaición del Artículu 4 del Estatutu d’Autonomía d’Asturies fecha pola Ponencia de Reforma Estatutaria (PSOE-PP), negándo-yos la reconocencia de cooficialidá a la llingua asturiana y al gallego-asturianu nel so ámbitu, nun reconociendo el calter d’estes llingües como patrimonios culturales vivos y, al empar, medios d’espresión d’una comunidá llingüística con trescendencia pública, tal y como asina lo afita la nuesa doctrina xurisprudencial
Artículu
4
1.
L'asturianu y'l gallego-asturiano constitúin una de les manifestaciones más
destacaes del patrimoniu llingüísticu d'Asturies y un valir social de respetu,
convivencia y entendimientu.
2. El Principáu d'Asturies va velar por promover y fomentar el so usu, asina
como'l so espardimientu nos medios de comunicación y la enseñanza, respetando
en tou casu les variantes llocales y la voluntariedá nel so aprendizax.
3.
Una Llei aprobada polos dos tercios de la Xunta Xeneral del Principáu va
regular el so usu, enseñanza, proteición y promoción.
II
Propuesta de redaición del Artículu 4 del Estatutu d’Autonomía d’Asturies recoyendo la reconocencia de cooficialidá ensin obligatoriedá de la llingua asturiana y del gallego-asturianu nel so ámbitu, fecha pol Conceyu Abiertu pola Oficialidá, plataforma independiente qu’axunta a más de 250 organizaciones civiles y culturales asturianes
Artículu 4
1. Les llingües
cooficiales del Principáu d'Asturies son el castellanu y l'asturianu. El
gallego-asturianu, tamién ye llingua oficial nel so ámbitu territorial.
2. Tolos ciudadanos tienen
derechu a conoceles y usales. Naide va poder ser discrimináu pola mor de la
llingua que llibremente escueya y utilice.
3. Les Alministraciones públiques
han garantizar l'usu normal d'estes llingües, amás de la so promoción, enseñanza
y presencia amañosa nos medios de comunicación.
4. Una llei de la Xunta Xeneral del Principáu tien de determinar los criterios del procesu de normalización llingüística.