Plan pa la Normalización Social del Asturianu 2005-2007

Atrás    PDF   (GAL-AST)   (ES)

El Principáu d’Asturies, amás de los rasgos compartíos como comunidá autónoma y rexón europea, axunta toa una riestra de peculiaridaes que ponen de relieve la so identidá propia onde s’enmarquen munchos rasgos de tipu económicu, xeográficu, históricu, etc. El bable o asturianu tien un llugar destacáu ente estos rasgos identitarios que, amás de cumplir una función cohesionadora y vertebradora de la comunidá autónoma, valen de centru d’atención y d’atraición nun mundu cada vuelta más interconeutáu.

La nuestra llingua ye una parte sustancial del patrimoniu cultural d’Asturies y poro, forma parte de los parámetros de la nuestra diversidá sociocultural, superponiéndose a otres realidaes sociolóxiques que les alministraciones públiques, en collaboración con entidaes y asociaciones, reconocemos y atendemos, siguiendo un principiu de respetu elemental y valoración de lo que ye distinto.

Ye obligao pa les instituciones asturianes, según afita la Llei del Principáu d’Asturies 1/2001, de 6 de marzu, de Patrimoniu Cultural, protexer y caltener el patrimoniu cultural en toles sos manifestaciones, incluyío la llingua. El Principáu d’Asturies, pente medies del Plan pa la Normalización Social del Asturianu, asume esta obligación diseñando un conxuntu de midíes que favorezan l’usu social del asturianu, la so proteición y promoción.

L’usu de la llingua autóctona en tou tipu de d’actividaes xenera un texíu de producción económica y cultural onde se verán involucraos escritores, periodistes, editores, músicos/es, productores fonográficos, enseñantes, pedagogos/es, diseñadores, publicistes, etc. Anguaño, estes actividaes al rodiu del asturianu caltiénense con gran vigor, en dellos aspeutos, tán algamando un grau de madurez importante.

L’Estatutu d’Autonomía del Principáu d’Asturies establez nel so artículu 4: “El bable gociará de proteición, afalaráse’l so usu, el so espardimientu nos medios de comunicación y la so enseñanza, respetando, en tou casu, les variantes llocales y la voluntariedá nel so deprendimientu.” D’esta miente, nel artículu 10.1.21 señálase como competencia del Principáu: “el fomentu y proteición del bable nes sos distintes variantes que como modalidaes llingüístiques, úsense nel territoriu de Principáu d’Asturies”.

Desque s’aprobó’l nuevu estatutu, el Principáu d’Asturies asumió la direición, coordinación y desendolque de les actividaes rellacionaes col asturianu, foron estableciéndose midíes de promoción d’esti, especialmente nel campu de la enseñanza. Estes midíes tienen como enfotu la recuperación, conservación y promoción de la nuestra llingua autóctona.

La Llei 1/98, del 23 de marzu d’Usu y Promoción del Bable/Asturianu establez nel so artículu 3.a “Ye oxetu de la presente Llei amparar el derechu de los asturianos a conocer y usar el bable/asturianu y establecer los medios que lo faigan efeutivu”. Estes disposiciones llegales nun evitaron que l’asturianu y el gallego-asturianu o fala del occidente d’Asturies, constituyan realidaes llingüístiques que tán perdiendo númberu de falantes y amenorgando nel usu social, ye entós necesario avanzar nel afitamientu de lo que se fizo hasta’l presente y fai falta entamar una aición coordinada y planificada empobinada a enanchar y facilitar les oportunidaes d’usu social del asturianu, garantizando la so proteición y promoción como patrimoniu coleutivu.

La realidá na Unión Europea carauterízase por fomentar la reconocencia y el respetu pola diversidá llingüística, alloñándose cada vez más de les práutiques uniformadores d’otros tiempos. Nesti sen, el Plan pa la Normalización Social del Asturianu, anda a la gueta d’un tratamientu dignu tanto del bable o asturianu como del gallego–asturianu, aspirando a un afitamientu dafechu del respetu y la tolerancia llingüística.

El presente plan tien l’enfotu de llantar les bases d’una normalización social de la llingua autóctona, entendiendo qu’hai déficits nes funciones sociales del bable o asturianu y del gallego-asturianu o fala del occidente, que van facer por superase con midíes específiques. Respetando siempre los principios de llibertá y voluntariedá nel so usu por parte de la ciudadanía.

El Plan pa la Normalización Social del Asturianu tien los siguientes oxetivos:

• Fomentar pasu ente pasu l’usu institucional y públicu dende les alministraciones.

• Cooperar coles midíes de política llingüística que pongan en marcha los ayuntamientos asturianos.

• Afalar la utilización del bable o asturianu y la fala del occidente d’Asturies nos medios de comunicación, tanto los de titularidá pública como privada.

• Garantizar, nes meyores condiciones, la enseñanza del asturianu y del gallegoasturianu en tolos niveles educativos respetando la voluntariedá.

• Afitar la toponimia tradicional d’Asturies y oficializala, xenerando’l so usu.

• Desenvolver la información al rodiu de la llingua autóctona, como tamién les actitúes positives tocante a la mesma.

• Da-y puxu al usu del asturianu n’ámbitos como los empresariales, deportivos, sindicales, culturales, artísticos, etc.

• Fomentar l’usu de la nuestra llingua como vehículu d’espresión cultural, asina como l’espardimientu de los productos naturales en llingua autóctona.

El gallego-asturianu o fala del occidente d’Asturies tendrá un tratamientu asemeyáu al bable o asturianu en toles midíes que se recueyen nel plan presente.

La Conseyería de Cultura, Comunicación Social y Turismu, pente medies de la Direición Xeneral de Promoción Cultural y Política Llingüística y de la Oficina de Política Llingüística, desendolcará les funciones relatives al desendolcu, coordinación, control y evaluación de los programes, oxetivos y aiciones recoyíos nel presente plan.

Dalgunos son los testos llegales qu’amparen les actuaciones en materia llingüística y un plan pa la Normalización Social del Asturianu:

• La Constitución Española

• L’Estatutu d’Autonomía del Principáu d’Asturies

• La Llei 1/98 del 23 de marzu, d’Usu y Promoción del bable/asturianu.

• El Decretu 85/2003 del 29 de xunetu, d’estructura orgánica básica de la Conseyería de Cultura, Comunicación Social y Turismu.

• El Decretu 38/2002 del 4 d’abril, col que se regula la Xunta Asesora de Toponimia del Principáu d’Asturies.

• El decretu 98/2002 del 18 de xunu, col que s’establez el procedimientu de recuperación y afitamientu de la toponimia asturiana.

• El decretu 71/2004 del 16 de setiembre y el 72/2004 del 16 de setiembre, colos que s’aprueben los currícula de Llingua Asturiana d’ESO y Bachilleratu.

OXETIVU XENERAL.- Afalar pasu ente pasu l’usu institucional y públicu del bable o asturianu, y del gallego-asturianu o fala del occidente d’Asturies nel ámbitu de l’Alministración y organismos del Principáu d’Asturies.

Aición 1.- Aumentar l’emplegu del asturianu y del gallego-asturianu na publicidá institucional fecha por dalgún de los organismos del Principáu d’Asturies.

Plazu: Dende 2005.

Desendolque: Organismos y entes Públicos de l’Alministración del Principáu d’Asturies.

Aición 2.- Aumentar l’usu del asturianu y del gallego-asturianu nes distintes publicaciones del Gobiernu y de los distintos organismos del Principáu d’Asturies.

Plazu: Dende 2005.

Desendolque: Organismos y entes Públicos de l’Alministración del Principáu d’Asturies.

Aición 3.- Afalar de forma gradual l’emplegu de la llingua autóctona nel Portal Princast.

Plazu: Dende 2005.

Desendolque: Los organismos emisores de la información publicada, col asesoramientu de la Conseyería de Cultura, Comunicación Social y Turismu.

Aición 4.- Incluyir nel Manual d’identidá gráfica del Principáu d’Asturies la imaxe corporativa y logotipos billingües pa la so aplicación polos distintos organismos del Principáu, y tamién la progresiva rotulación de dependencies oficiales.

Plazu: Dende 2005.

Desendolque: Conseyería de Cultura, Comunicación Social y Turismu, y Conseyería de la Presidencia.

Aición 5.- Proponer un Conveniu Marcu ente’l Principáu d’Asturies y l’Alministración Xeneral del Estáu pal usu del bable o asturianu, y nel so ámbitu del gallego-asturianu, por parte de los organismos del Estáu asitiaos n’Asturies.

Plazu: Añu 2005.

Desendolque: Conseyería de la Presidencia.

Aición 6.- Afalar l’usu del asturianu y de la fala del occidente nos museos y biblioteques del Principáu d’Asturies.

Plazu: Dende 2005, entamando polos más rellacionaos cola cultura asturiana:

Muséu Etnográficu del Pueblu d’Asturies, Muséu de la Sidra, Museos Etnográficos de Grandas de Salime y de Porrúa (Llanes).

Desendolque: Conseyería de Cultura, Comunicación Social y Turismu.

Aición 7.- Algamar l’usu de la llingua asturiana, y de la fala del occidente, n’ocasiones d’especial relevancia programaes a lo llargo del añu, entamaes pol Principáu d’Asturies, o nos que’l Principáu participa de manera preeminente: Selmana de les Lletres Asturianes, Día d’Asturies…

Plazu: Dende 2005.

Desendolque: Dellos organismos del Principáu d’Asturies, col asesoramientu de la Conseyería de Cultura, Comunicación Social y Turismu.

Aición 8.- Facilitar gradualmente al personal del Principáu d’Asturies la conocencia y l’emplegu de la llingua asturiana, y nel so ámbitu del gallego-asturianu.

Plazu: Dende l’añu 2005.

Desendolque: Conseyería d’Economía y alministración Pública.

Aición 9.- Valorar la llingua asturiana y el gallego-asturianu, nel so ámbitu nes oposiciones y concursos, entamaos pol Principáu d’Asturies, cuando les carauterístiques del puestu de trabayu y la naturaleza de les funciones que vayan desendolcar lo necesite.

Plazu: Dende l'añu 2005.

Desendolque: Conseyería d’Economía y Alministración Pública.

Aición 10.- Afalar cursos específicos y de formación complementaria pal personal de la Oficina de Política Llingüística que nun tenga la conocencia reglada de llingua asturiana.

Plazu: Dende’l 2005.

Desendolque: Conseyería d’Economía y Alministración Pública.

Aición 11.- Potenciar los cursos de llingua asturiana y de gallegoasturianu ufiertaos pol Institutu d’Alministración Pública “Adolfo Posada” pal funcionariáu del Principáu d’Asturies.

Plazu: Añu 2005.

Desendolque: Institutu Asturianu d’Alministración Pública “Adolfo Posada” en coordinación cola Conseyería de Cultura, Comunicación Social y Turismu.

Aición 12.- Participar nos Foros nos que se toquen temes tocantes a la Política Llingüística.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 13.- Espublizar les Lleis y dellos testos normativos relevantes de forma billingüe.

Plazu: Dende 2005.

Desendolque: Conseyería de la Presidencia.

Aición 14.- Afondar nuna meyor conocencia de la nuestra realidá sociollingüística.

Plazu: Dende 2005

Desendolque: Conseyería de Cultura, Comunicación Social y Turismu.

Aición 15.- Collaborar cola Academia de la Llingua pal desarrollu de les xeres que-y atribuye la Llei 1/98 de 23 de marzu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 16.- La Conseyería de Cultura, Comunicación Social y Turismu ye’l muérganu afayadizu pa la validación de les tornes de tolos testos que tengan de ser publicaos en bable nel Boletín Oficial del Principáu d’Asturies y de tou tipu de documentación n’asturianu y gallegoasturianu.

Plazu: Dende 2005.

Desendolque: Conseyería de Cultura, Comunicación Social y Turismu.

OXETIVU XENERAL.- Sofitar y cooperar coles midíes de política llingüística qu’entamen los Ayuntamientos nel so ámbitu.

Aición 17.- Facilitar asesoramientu téunicu a los conceyos que decidan poner en marcha los servicios de normalización sociollingüística nel ámbitu municipal.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 18.- Sofitar económicamente’l desarrollu de programes que tean d’acordies colos oxetivos xenerales del presente Plan pa la normalización social del asturianu y del gallego-asturianu nel ámbitu municipal, al traviés de la convocatoria de subvenciones.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 19.- Afalar nel ámbitu municipal estudios en o al rodiu del asturianu y del gallego-asturianu.

Plazu: Añu 2005.

Desendolque: Conseyería de Cultura, Comunicación Social y Turismu.

OXETIVU XENERAL.- Garantizar, nes condiciones más afayadices, el derechu a la enseñanza de la llingua asturiana y, na so fastera, del gallego-asturianu o fala.

Aición 20.- Completar la redacción de los currículos de Llingua Asturiana, Gallego-Asturianu d’Enseñanza Primaria, Enseñanza Secundaria y Bachilleratu.

Plazu: Añu 2005

Desendolque: Conseyería d’Educación y Ciencia.

Aición 21.- Completar les pautes d’adecuación de los currículos d’otres materies a la realidá cultural asturiana.

Plazu: Añu 2005

Desendolque: Conseyería d’Educación y Ciencia.

Aición 22.- Desendolcar añalmente una Campaña Informativa de Matriculación en Llingua Asturiana y Gallego-Asturianu pa esparder nos periodos de matriculación.

Plazu: Dende 2005

Desendolque: Conseyería d’Educación y Ciencia y Conseyería de Cultura, Comunicación Social y Turismu.

Aición 23.- Garantizar la ufierta de Llingua Asturiana y Gallego-Asturianu en tolos niveles y graos educativos, respetando la voluntariedá del so deprendimientu.

Plazu: Dende 2005

Desendolque: Conseyería d’Educación y Ciencia.

Aición 24.- Asegurar na enseñanza del asturianu y del gallegoasturianu’l cumplimientu del númberu mínimu d’escolines, acordies colo que ta marcáo nes instrucciones y resoluciones de la Conseyería d’Educación y Ciencia, onde se desarrollen tamién los criterios de flexibilidá.

Plazu: Añu 2005

Desendolque: Conseyería d’Educación y Ciencia.

Aición 25.- Afitar un programa de coordinación y siguimientu del bable o asturianu y del gallego-asturianu o fala del occidente.

Plazu: Dende 2005

Desendolque: Conseyería d’Educación y Ciencia.

Aición 26.- Fomentar y sofitar programes específicos nos qu’intervién la Llingua Asturiana y el Gallego-Asturianu, como “Per dayuri Asturies” o “Crecer leyendo / Medrar lleendo”.

Plazu: Dende 2005

Desendolque: Conseyería d’Educación y Ciencia y Conseyería de Cultura, Comunicación Social y Turismu.

Aición 27.- Cooperar coles iniciatives de la Universidá, o de los sos centros, favoratibles a la normalización social ya investigación de la llingua autóctona.

Plazu: Dende 2005.

Desendolque: La Conseyería d’Educación y Ciencia y la Conseyería de Cultura, Comunicación Social y Turismu.

Aición 28.- Sofitar les aiciones ya iniciatives entamaes pola Universidá d’Uviéu pa la creación y reconocencia de los títulos homologaos de Filoloxía Asturiana, nel marcu del espaciu universitariu européu.

Plazu: Dende 2005

Desendolque: La Conseyería d’Educación y Ciencia.

Aición 29.- Afalar la edición d’un manual y desendolcar un Programa Xeneral pa la Enseñanza de xente adulto al rodiu la llingua y cultura asturiana.

Plazu: Añu 2005.

Desendolque: Conseyería d’Educación y Ciencia.

Aición 30.- Siguir promoviendo l’ameyoramientu de la formación permanente del Profesoráu que ta dando llingua asturiana y gallegoasturianu, como tamién la conocencia y espardimientu de los aspeutos de la cultura tradicional.

Plazu: Dende 2005

Desendolque: Conseyería d’Educación y Ciencia y Universidá d’Uviéu.

Aición 31.- Puxar pola convocatoria de subvenciones pa la edición de llibros de testu en Llingua Asturiana y Gallego-Asturianu.

Plazu: Dende 2005.

Desendolque: Conseyería d’Educación y Ciencia y Conseyería de Cultura, Comunicación Social y Turismu.

Aición 32.- Desendolcar materiales didáuticos en soporte multimedia pa la incorporación d’aspeutos sociollingüísticos asturianos nes distintes estayes.

Plazu: Añu 2005

Desendolque: Conseyería d’Educación y Ciencia

Aición 33.- Afalar l’actualización de los fondos de llibros n’asturianu, y en gallego-asturianu nel so ámbitu, nes biblioteques de los centros, dende’l proyeutu común de favorecer la integración de la Biblioteca nel Centru.

Plazu: Dende 2005.

Desendolque: Conseyería d’Educación y Ciencia y col sofitu de la Conseyería de Cultura, Comunicación Social y Turismu.

Aición 34.- Desendolcar un estudiu xurídicu al rodiu de la posible especialidá del profesoráu de llingua asturiana y gallego-asturianu na enseñanza non universitaria.

Plazu 2006.

Desendolque: Conseyería d’Educación.

OXETIVU XENERAL.- Afitar los topónimos tradicionales n’asturianu y gallegoasturianu, facelos oficiales y xeneralizar el so emplegu.

Aición 35.- Regular el funcionamientu de la Xunta Asesora de Toponimia del Principáu.

Plazu: Añu 2005

Desendolque: Conseyería de Cultura, Comunicación Social y Turismu.

Aición 36.- Ellaborar los espedientes toponímicos parciales per conceyos o mancomunidaes, en tando sentíos, pa la so aprobación y oficialización pol Conseyu de Gobiernu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 37.- Publicar el Nomenclátor y mapa de Topónimos Oficiales del Principáu d’Asturies.

Plazu: Añu 2007.

Desendolque: Conseyería de Cultura, Comunicación Social y Turismu.

Aición 38.- Desendolcar campañes informatives afitando’l so emplegu sobre’l nomenclátor toponímicu oficial nos organismos públicos.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 39.- Renovar y facer afayadiza pasu ente pasu la rotulación toponímica de víes públiques y carreteres del Principáu d’Asturies.

Plazu: Dende 2005.

Desendolque: Conseyería de Mediu Ambiente, Ordenación del Territoriu ya Infraestructures.

Aición 40.- Renovar y facer afayadiza pasu ente pasu la rotulación toponímica de mapes y planos oficiales del Principáu d’Asturies.

Plazu: Dende 2005.

Desendolque: Conseyería de Mediu Ambiente, Ordenación del Territoriu ya Infraestructures.

Aición 41.-Desenvolver un Protocolu o Conveniu cola Alministración Xeneral del Estáu pa la reconocencia y emplegu de la toponimia oficializada.

Plazu: Añu 2005.

Desendolque: Conseyería de Cultura, Comunicación Social y Turismu.

OXETIVU XENERAL: Afalar y garantizar l’usu del bable o asturianu, y del gallego-asturianu o fala nos medios de comunicación.

Aición 42.- Ellaborar unes bases pal tratamientu de la llingua asturiana nos medios de comunicación.

Plazu: Añu 2005.

Desendolque: Conseyería de Cultura, Comunicación Social y Turismu.

Aición 43.- Sofitar la normalización social del bable o asturianu y del gallego-asturianu nos medios de comunicación per aciu de convocatories públiques de subvenciones.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 44.- Entamar cursos específicos, col sofitu de la Universidá d’Uviéu y l’Academia de la Llingua, pal emplegu de la llingua asturiana y del gallego-asturianu o fala, polos profesionales de los medios de comunicación.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 45.- Afalar l’usu de la llingua asturiana y de la fala del occidente d’Asturies, nel Ente Públicu de Comunicación del Principáu d’Asturies, como instrumentu de normalización social.

Plazu: Dende 2005.

Desendolque: Conseyería de Cultura, Comunicación Social y Turismu y ente Públicu de Comunicación del Principáu d’Asturies.

OXETIVU XENERAL.- Desenvolver la información tocante al bable o asturianu y al gallego-asturianu o fala del occidente, nel so ámbitu, y tamién los vezos llingüísticos positivos, afitando al tiempu l’usu social de la nuestra llingua.

Aición 46.- Desendolcar campañes añales de fomentu del usu y de sensibilización positiva del asturianu y del gallego-asturianu nel so ámbitu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 47.- Afalar l’emplegu del bable o asturianu y del gallego-asturianu na estaya social del deporte.

Plazu: Dende 2005

Desendolque: Conseyería de Cultura, Comunicación Social y Turismu.

Aición 48.- Afalar l’usu de la llingua asturiana y del gallego-asturianu o fala n’empreses, comercios y establecimientos hosteleros.

Plazu: Dende 2005.

Desendolque: Conseyería de Cultura, Comunicación Social y Turismu, y Conseyería d’Industria y Emplegu.

Aición 49.- Desendolcar campañes de sensibilización empobinaes a dignificar y valorar l’usu del bable o asturianu nes marques de calidá, sobre manera nel sector agroalimentariu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 50.- Facer promoción del usu de la onomástica personal na nuestra llingua autóctona.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 51.- Favorecer l’usu del asturianu y gallego-asturianu nes denominaciones d’orixe de productos tradicionales, asina como contribuyir a la so imaxe de calidá.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 52.- Afalar l’usu del asturianu y del gallego-asturianu o fala na actividá de les asociaciones, sobre manera na so proyeición pública.

Plazu: Añu 2005.

Desendolque: Conseyería de Cultura, Comunicación Social y Turismu.

OXETIVU XENERAL.- Afalar l’usu del bable o asturianu, y na so fastera del gallego-asturianu o fala del occidente, como mediu d’espresión cultural en tolos niveles, y tamién l’espardimientu de los productos culturales en llingua autóctona.

Aición 53.- Afitar la edición de llibros n’asturianu y en gallego-asturianu, favoreciendo la calidá y l’enfotu sociollingüísticu pente medies de la convocatoria de subvenciones.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 54.- Sofitar la edición de llibros de lliteratura infantil y xuvenil n’asturianu y en gallego-asturianu per aciu de la convocatoria de subvenciones.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 55.- Sofitar la normalización social de la llingua asturiana, y nel so casu de la fala del occidente, nes producciones musicales, favoreciendo la calidá.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 56.- Sofitar la normalización social de la llingua asturiana, y nel so casu de la fala del occidente, nes actividaes audiovisuales y cinematográfiques, favoreciendo la calidá.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 57.- Potenciar concursos lliterarios na nuestra llingua autóctona.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 58.- Afalar la Creación Lliteraria n’Asturianu y en Gallego-Asturianu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 59.- Publicar añalmente l’actualización del catálogu bibliográficu en bable o asturianu y en gallego-asturianu.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 60.- Espublizar por coedición les obres premiaes nos concursos convocaos pola Conseyería de Cultura.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 61.- Esparder la distribución de llibros n’asturianu y en gallegoasturianu, en biblioteques, en centros d’enseñanza y Centros Asturianos.

Plazu: Dende 2005.

Desendolque: Conseyería de Cultura, Comunicación Social y Turismu, Conseyería d’Educación y Ciencia, Conseyería de Xusticia, Seguridá Pública y Rellaciones Esteriores, y la Conseyería de la Presidencia.

Aición 62.- Afitar el desendolcu de cursos de bable o asturianu y de la fala del occidente pa emigrantes y los sos descendientes.

Plazu: Dende 2005.

Desendolque: Conseyería de Cultura, Comunicación Social y Turismu, Conseyería de Xusticia, Seguridá Pública y Rellaciones Esteriores y la Conseyería de la Presidencia.

Aición 63.- Afalar la presencia de la producción editorial n’asturianu y en gallego-asturianu nes feries de llibros de dientro y de fuera d’Asturies.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 64.- Potenciar la Selmana de les Lletres Asturianes.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 65.- Afitar la celebración del Alcuentru d’Escritores n’Asturianu Occidental.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 66.- Afitar el Premiu de les Lletres Asturianes de periodicidá biañal.

Plazu: Dende 2006.

Desendolque: Conseyería de Cultura, Comunicación Social y Turismu.

Aición 67: Participar na esposición Expolingua de Madrid.

Plazu: Dende 2005.

Desendolque: Conseyería de Cultura, Comunicación Social y Turismu.

Aición 68.- Organizar un gran esposición de la llingua y cultura asturiana con calter itinerante.

Plazu: Añu 2006.

Desendolque: Conseyería de Cultura, Comunicación Social y Turismu.

El Plenu de la Xunta Xeneral, na sesión celebrada'l 23 de xunu de 2005, debatió'l Plan pa la Normalización Social del Asturianu y les propuestes de resolución presentaes polos Grupos Parlamentarios y, acoyéndose a lo previsto nel art. 201 del Reglamentu la Cámara, aprobó esta

RESOLUCIÓN

1. La Xunta Xeneral del Principáu d’Asturies insta al Conseyu de Gobiernu a incluyir Acciones qu’informen sobre les funciones de la Xunta Asesora de Toponimia del Principáu y que favorezan la elaboración d’espedientes toponímicos en conceyos o mancomunidaes.

2. La Xunta Xeneral del Principáu d’Asturies insta al Conseyu de Gobiernu a facer campañes específiques d’información que favorezan a normalización social del asturianu nel ámbitu municipal.

3. La Xunta Xeneral del Principáu d’Asturies insta al Conseyu de Gobiernu a incluyir el bable/asturianu dientro la oferta de materies optatives pa toles modalidaes de Bachilleratu, n'aplicación de lo afitao nel artículu 10 da Llei 1/1998, de 23 de marzo, d’Usu y Promoción del Bable/Asturianu.

4. La Xunta Xeneral del Principáu d’Asturies insta al Conseyu de Gobiernu a un plan de supervisión y evaluación del desarrollu los currículos de bable y la so aplicación práutica nel aula.

5. La Xunta Xeneral del Principáu d’Asturies insta al Conseyu de Gobiernu a estender la garantía d’ufierta educativa de llingua asturiana y gallego-asturiano (acción 23 del Plan) a tolos centros escolares sosteníos con fondos públicos.

6. La Xunta Xeneral del Principáu d’Asturies insta al Conseyu de Gobiernu a completar l'acción 61 del Plan favoreciendo la creación de seiciones específiques de materiales relacionaos cola llingua y cultura asturianes nos centros escolares.

7. La Xunta Xeneral del Principáu d’Asturies insta al Conseyu de Gobiernu a contemplar, entre les acciones de promoción, campañes que potencien les posibilidaes d’entender, falar y lleer en bable/asturianu o en gallego-asturiano a la población menor de trenta años.

8. La Xunta Xeneral del Principáu d’Asturies insta al Conseyu de Gobiernu a contemplar ente les acciones de promoción, d’un xeitu específicu hacia les muyeres, campañes que potencien les posibilidaes d’entender, falar y lleer en bable/asturianu o en gallego-asturiano.

Arriba     Atrás    PDF   (GAL-AST)   (ES)