Presentación de www.xuristes.as, la páxina web del Aconceyamientu de Xuristes pol Asturianu
Xosé Lluis del Río FernándezAtrás PDF
El 25 de mayu -día perseñaláu pa los asturianos- del añu 2006, constituyóse formalmente n'Uviéu l'Aconceyamientu de Xuristes pol Asturianu (AXA), integráu por más de mediu centenar de xuristes, ente los que s'atopen representaes cuasi toles estayes profesionales: Universidá, Alministración Autonómica y Municipal, Notariáu y Abogacía. Sicasí, dende AXA seguimos convidando a integrase nella a los más de los xuristes posibles, porque cuidamos que'l mirar pola llingua propio y los derechos de los sos falantes -trabayando al cabu pola so dignificación y salvaguarda-, ye un llabor del que dengún xurista asturianu habría desertar.
Anguaño, tres más d’añu y mediu de trabayu ininterrumpíu y muncho bien intensu, presentamos a la sociedá cola que tamos comprometíos la nuesa páxina web, www.xuristes.as.
Cuidamos qu’esta poderosa ferramienta habrá valir pa facilitanos el llabor de seguir trabayando pola normalización xurídica de la realidá llingüística asturiana, al empar que mos permitirá atender de mou más eficaz –dende la particular perspeutiva xurídica- les munches necesidaes y demandes que reclamen anguaño los ciudadanos falantes d’asturianu (información, orientación en casu necesidá d’amparu llegal, etc.).
Dende esti presupuestu, la páxina ñaz cola vocación d’implementase como una eficaz fonte d’nformación xurídica relativa al fenómenu llingüísticu asturianu y, al traviés d’ella, del fermosu y ricu mosaicu llingüísticu qu’integren les llingües rexonales o minoritaries nesta Europa de nueso, la Europa del sieglu XXI.
Amás de recoyer la información concerniente a la propia ASOCIACIÓN (estatutos, grupos de trabayu, aconceyamientos, etc.), l’estoyu NOTICIES relacionaes cola realidá cotidiana de los derechos llingüísticos de los asturfalantes y les DECLARACIONES públiques y notes de prensa qu’emita l’Aconceyamientu, dedicamos un requexu a la OPINIÓN, xurídicamente bien afitada, sobre l’estáu y la evolución nel tiempu de la regulación xurídica del nuesu particular fenómenu llingüísticu, con claru envís didáuticu y críticu.
El llabor d’AXA queda espeyáu nes nueses ACTUACIONES (a nivel alministrativu, xudicial, de negociación o didáuticu) y nos nuesos TRABAYOS (dictámenes ya informes xurídicos). Ufrimos, amás, MATERIALES práuticos d’interés (formularios) que podrán dir facilitando’l llabor y usu normal de la llingua asturiana a tolos profesionales del derechu que quieran mandase d’ella.
Ente los proyeutos que queremos poner en marcha dende l’Aconceyamientu, ta el d’un Observatoriu de Derechos Llingüísticos (ODLL) que seya quien –en colaboración con otres asociaciones o instituciones- pa promover estudios ya informes periódicos que sirvan como indicadores acerca la situación de respetu o conculcación de los derechos llingüísticos n'Asturies, presentándolos énte la sociedá asturiana y énte les instituciones asturianes ya internacionales.
Arriendes d’ello, implementamos un SERVICIU D’ORIENTACIÓN XURÍDICA PA LA DEFENSA LOS DERECHOS LLINGÜÍSTICOS (SOX) nel que, al traviés d’un cenciellu formulariu, los falantes van poder denunciar les situaciones concretes de violación de los sos derechos llingüísticos, comprometiéndonos dende l’Aconceyamientu a facilita-yos la presentación de les sos quexes o denuncies nos casos concretos de falta de respetu al so derechu a usar la llingua propia, cuando se-yos niega esti derechu o cuando se-yos causa un perxuiciu por exercitalu; la tramitación d'eses quexes énte les instituciones públiques o privaes, dándo-yos el cursu más afayadizu; y, si ye'l casu, el recursu a la vía xudicial en defensa los sos derechos llingüísticos.
Dientro la nuesa páxina, merez especial consideranza LLINGUALEX, la nuesa Base de Datos Documental, referida non sólo al particular fenómenu llingüísticu asturianu, sinón tamién al enteru dominiu llingüísticu ástur-lleonés. El so accesu ye llibre y quier ser una ferramienta amañosa pa los estudiosos y profesionales del Derechu, al tiempu qu'un gabitu p'algamar l’espardimientu de la conocencia de los derechos llingüísticos ente los propios falantes y la sociedá en xeneral. LLINGUALEX ta integrada por artículos doctrinales qu'analizan dende una perspeutiva xurídica cualisquier aspeutu relativu a les llingües rexonales o minoritaries, con especial atención al fenómenu llingüísticu asturianu; llexislación relativa les llingües rexonales o minoritaries, con especial atención al nuesu fenómenu llingüísticu; xurisprudencia y Doctrina Constitucional ya Institucional qu'emane de Xueces, Tribunales y otros órganos de l'Alministración, n'interpretación y/o aplicación de les estremaes normes dictaes en materia llingüística; y referencies documentales de calter sociollingüísticu o xurídicu-alministrativu relacionaes col fenómenu llingüísticu asturianu que sirvan p’aidanos a comprendelu cada vuelta meyor.
Pero’l nuestru llabor como xuristes comprometíos con esta sociedá, quedaría coxu sinón fuésemos quién pa mirar más allá del sólu fenómenu llingüísticu. El derechu propiu, el Derechu Asturianu como oxetu d’estudiu, reflesión y propuesta innovadora –tanto dende la so vertiene pública como dende la so vertiente privada-, atopa tamién un llugar importante nel llabor desendolcáu polos compañeros que davezu colaboren col grupu de trabayu qu’integra’l Conceyu d’Estudios Xurídicos L’ESCALIU.
Una ventana al mundu al traviés de los nuesos ENLLACES, facilitará’l llabor d’aquelles persones interesaes en formase y documentase acerca la cada vuelta mayor relevancia de los derechos llingüísticos; acerca la so importancia y la so reconocencia nes sociedaes más avanzaes del planeta; acerca’l respetu que tienen de merecenos a toos esos derechos y acerca la so regulación y proteición xurídica; too ello metanes d’un mundu que, dende AXA, queremos alloñáu lo más posible d’una mísere, gris y mal entendida globalización uniformadora.
Como ye bien fácil d’entender pola propia naturaleza dinámica del entornu dixital, www.xuristes.as nun ye un proyeutu estáticu, pieslláu sobre sí mesmu. A la contra, queremos ser un proyeutu dinámicu, abiertu a toos. Dende yá convidamos a tolos asociaos a participar activamente nel trabayu diariu d’AXA, al traviés de cualisquier de los Grupos de Trabayu o estaya que-yos resulte de mayor interés. Pa ello, nun tienen más que contautar col nuesu Secretariu, que los empobinará de la forma más afayadiza. Contamos con seguir medrando, espeyando’l llabor de l’Aconceyamientu y, pali que pali, seguir atropando tola información que mos permita ufiertar a la sociedá los frutos del nuestru llabor en defensa la dignidá d’esta llingua y de los sos falantes.
N’Uviéu,
a 15 d’avientu de 2007.
Xosé Lluis del Río Fernández – Abogáu. Vocal
responsable de la estaya d’Informática, edición electrónica y
documentación del Aconceyamientu de Xuristes pol Asturianu (AXA).