Atrás     PDF

Nun me preocupé de comprobar les feches concretes, pero lo que va darréu ye, a xulgar por los periódicos, una bona síntesis d`una selmana n`Asturies. De llunes, por exemplu, el secretariu de los socialistes de Xixón descalifica a la plataforma SOS Cabueñes por nun llevar a la xusticia l`escuru asuntu urbanísticu. Énte la escandalera que se monta, unos díes dempués, el mesmu secretariu escribe un artículu, que se contaba de disculpa pero qu`en realida diz que los vecinos foron unos irresponsables. Otru día, el segundu periodicu de mas tirada, dedíca-y les dos primeres páxines al importante asuntu del cambiu de puntuación pal entrante campeonatu de F1 y llama a los asturianos al sosiegu porque, a lo que paez, el nuevu R29 de Fernando carbura bárbaro. Al mesmu tiempu, la revista Interviú, fai un prestosu publireportaxe de Llanes, nel que, con fotos paisaxistiques, da anuncia de trece actuaciones urbanístiques n`entornos privilegiaos. De martes, almorzamos con una foto del presidente`l Principau, la ministra d`Educación y la consejera de Bienestar Social, vistíos de domingo y garrándose de les seis manes como si se tratara del final d`un tiempo muertu de baloncesto. La ministra aportó al pais p`apurrir un cheque de 12,2 millones y lo bueno del casu ye que nun consta qu`esta vez hubiere polémica dala sobre la xinta de dempués, y na foto nun se ve tortiella por nengun llau. Fecha la prueba, nun falta mas qu`el diagnósticu.