Atrás PDF
Por más tiempu que-y dedico a lleer la entrevista al Sr. Lastra (LES NOTICIES Dixital 18 d’avientu) menos soi a entender lo que diz l’ilustre premiáu. La entrevista nun tien desperdiciu, nunos casos polo que se diz, y n’otros, polo que dexa ver. Eso sí, bravura hai a cestaos.
Diz el Sr. Lastra, qu’él nun quier falar en términos antropolóxicos, sinon en términos xurídicos. Llantáu tan chocante finxu, y ye de suponer que falando en términos xurídicos, diz coses como que’l llímite que pon a la llingua asturiana ye’l reconocimientu de drechos, que nun ta d’alcuerdu col Tribunal Constitucional en cuanto a la oficialidá de facto, que’l matizaría la "opinión" del Conseyu d’Europa, y que a la oficialidá d’una llingua nada más se pue llegar al traviés del Estatutu. Dexa claro tamién que la güela del entrevistador tien que falar en castellanu, que si nun puede, "tien que poder" y, pa que se vea que’l tema nun ye personal, dizse que lo mesmo-y pasará a un británicu que viva nos Ozcos. Sí, home, sí.
Paez ser que, pal casu d’Asturies, el Conseyu d’Europa nun resuelve, opina, y, pa más señes, les sos opiniones pueden matizase. Per otru llau, el Tribunal Constitucional pue dicir lo que-y pete, pero un políticu responsable d’Asturies puede nun tar d’alcuerdu, porque se conoz que l’altu tribunal pa nós tampoco resuelve, sinón qu`opina.
Amás, anque, por exemplu, el catalán seya oficial por un Decretu de la Xeneralidá del añu 78, y l’eusquera por un Reglamentu de Réxime Interior tamién del 78, nel casu d’Asturies namás se pue algamar la oficialidá al traviés del estatutu. Cuento que ta pensando nel estatutu de los tres quintos, claro.
Y pa remate, una exhibición cuasi qu`impúdica de los vezos del aparatu; "El problema ye quién controla depués les acciones d’individuos que consideren que tienen un drechu."
¿Nun mete mieu?.