Anguañu n'Asturies tamos enllamorgaos nuna situación de cuasi total falta de respetu pa colos falantes d'asturianu y de gallegu-asturianu, a los que se-yos niega'l derechu a usar la so llingua nel desenvolvimientu la so actividá cotidiana, a la escontra lo afitao na Carta Europea de les Llingües Rexonales y Minoritaries y de la Constitución Española, asina como de la propia normativa autonómica (Llei d'Usu). L'anormalidá la regulación llegal del fenómenu llingüísticu n'Asturies y l'actitú de bona parte les Alministraciones Públiques al respeutive, motiva que los falantes sufran de contino vulneraciones de los sos derechos llingüísticos.

Énte esta situación, dende l'Aconceyamientu de Xuristes pol Asturianu (AXA), queremos facer por axudar a garantizar el derechu los ciudadanos asturianos al usu la so llingua propia na so vida cotidiana con normalidá, tanto nel ámbitu públicu como nel priváu.

Al traviés del llabor desinteresao de los nuesos miembros, ponemos a dimposición de los ciudadanos asturianos un Serviciu d'Orientación Xurídica pa la defensa los Derechos Llingüísticos (SOX), cola fin de facilita-yos:

• La presentación de les sos quexes o denuncies nos casos concretos de falta de respetu al so derechu a usar la llingua propia, cuando se-yos niega esti derechu o cuando se-yos causa un perxuiciu por exercitalu.

• La tramitación d'eses quexes énte les instituciones públiques o privaes, dándo-yos el cursu más afayadizu.

• Si ye'l casu, el recursu a la vía xudicial en defensa los sos derechos llingüísticos.

SOX
Denuncia les vulneraciones a los tos derechos llingüísticos

Esti formulariu unviaráse vía e-mail, revelando la direición de corréu del usuariu y ensin cifrar la información como midía de privacidá. Si l'usuariu entá nun dispón de cuenta de corréu, pue abrir una gratuita equí.

Picando nel botón "UNVIAR" d'esti formulariu, l'usuariu acepta estes condiciones y consiente nel tratamientu automatizáu de los sos datos personales, d'acordies colo afitao na Llei Orgánica de Proteición de Datos (LOPD).

La información que facilite destamiente l'usuariu, va ser utilizao por AXA d'acordies colos sos fines sociales namás que pa:

• Contautar col denunciante, cola fin de facilitá-y de forma desinteresao la orientación xurídica acondada al so casu.

• Xenerar una base datos na que consten les denuncies de los ciudadanos asturianos por vulneraciones a los sos derechos llingüísticos, que valga pa iguar o fundamentar posteriores estudios ya informes de calter xurídicu, estadísticu o sociollingüísticu sobre la situación de respetu o conculcación de los derechos llingüísticos n'Asturies.

L'usuariu que figure nes bases de datos d'AXA podrá exercitar en cualisquier momentu los sos derechos d'accesu, rectificación y cancelación, empobinando una carta ordinaria ACONCEYAMIENTU DE XURISTES POL ASTURIANU, con domiciliu en Cai/ Pérez de la Sala, 22, 7^uD d'Uviéu (Asturies), o bien al traviés de la siguiente direición de corréu electrónicu.