Atrás     PDF

Rabilando n'internet puede ún atopar un vídeu que nos recuerda una verdá del pasáu del presidente Vicente Álvarez Areces, una verdá qu'igual abulta incómoda: participó, en 1976, nuna de les pintureres manifestaciones de la transición, en Xixón, onde los parroquianos encamentaben, supongo qu'al gobernador civil, con "Bable a la escuela. Autonomía rexonal".

Los autores bienintencionaos del documentu pienso que cuenten con saca-y los colores al presidente Areces y poco menos qu'acusalu de ¿incoherencia?. Dexando pa prau que'l protagonista tien fácil defensa (¿nun tenemos "bable" nes escueles y "autonomía rexonal", anque agora los llamemos "llingua asturiana" y "Principáu d'Asturies"?), ye fácil pensar que tovía hai xente que considera la incoherencia, en política, como un delitu que castiga la opinión pública, reencarnada en cuerpu electoral el día de los comicios, ensin piedá nin duelgu.

Sicasí, la práctica diz que la incoherencia en política (en toles versiones posibles: dicir una cosa y facer otra, facer güei una cosa y mañana otra, dicir güei una cosa y mañana otra, facer que faes una cosa y al tiempu tar faciendo otra ) ye imprescindible p'algamar el poder, y pa caltenese bien afitáu enriba d'él, y hasta simplemente pa sobrevivir con un medianu pasar.

El presidente asturianu puede dir en 1976 a esa manifestación y, en tiempos recientes, llevar a los tribunales a los que protesten por nun tener derechos llingüísticos; puede negar la oficialidá del asturianu y, al tiempu, aplaudir un discursu de Zapatero nel Congresu presumiendo de la defensa de la pluralidá española, del respetu y aliendu que merecen toles llingües españoles; puede falar en gallegu en Santiago de Compostela pero nun dicir un "ye" en público nin con una caxa sidra pel medio. Y puede porque practica la incoherencia política con sabiduría

Él, el presidente, tamién dixo que l'aprobación del Estatutu catalán yera un reblagu de la izquierda y los españoles en xeneral (nun sabemos si un acta fundacional d'un home nuevu), y diz agora que nun va dexar qu'esa mesma llei estatutaria qu'él afalagó mengüe la nuestra financiación, que nun quier ver les balances fiscales o que los criterios catalanes pa la financiación nun son de recibu.

Pero la incoherencia nun ye una llosa onde sema namás nuestru presidente. Otru asuntu ye la dignidá cola que lo lleve caún, el descaru qu'enseñe en dicir y facer lo contrario según con quién, cuándo y ónde y l'aguante de los ciudadanos o'l querer dase cuenta. La meyor táctica pa tapecela ye la de da-y la vuelta a la incoherencia y, asina, nun s'equivocar nunca. Como un neñu cuando entruga y vuelve a entrugar hasta que la respuesta concide dafechu col so deséu y gana la partida llimpiamente.

Exemplos: cuando ún pasa años echando de la "cultura del ladrillu", y de los especuladores, y d'esmenu aporta la crisis, quier mandar perres del presupuestu (de los impuestos) a les empreses del sector y quier convertir por decretu viviendes llibres en viviendes con protección, non p'aliase con especuladores y constructores, los que se ficieron ricos y qu'agora queden ensin nada. Quier facelo pa que nun venga'l paru y pa dar techu a los que nun lu tienen.

Cuando ún glaya hasta esgañitase qu'España ruempe porque-y sal una resquiebra que va de los Pirineos a la costa murciana pasando pel valle del Ebro y aporten les elecciones y les pierde, quier amigase colos que primero apellidó de toles maneres non pa ganar les elecciones que vengan. Quier facelo p'axuntar voluntaes, territorios y xentes. Cuando ún deroga un plan hidrolóxicu por partidismu infantil y aporta la seca a un llugar onde gobierna, quier facer un trasvase non porque tuviera bien lo que taba pensao. Quier facelo porque hai una emerxencia. Cuando ún lleva un Estatutu, como'l catalán, delantre del Tribunal Constitucional porque nun hai coma que nun incumpla la "Llei de lleis" y toca discutir lo mesmo en Valencia, nun apreba coses asemeyaes a trescientos kilómetros porque quiera tocar y andar a la procesión al tiempu. Quier los mesmos derechos pa tolos ciudadanos.

Lo mesmo da si'l presidente Areces falaba bable en 1976, si escuchaba a La Pastorina cuando diba cortexar o si un día s'enfiló de sidra y dio-y por calzar madreñes. Él dirá y fadrá lo que-y convenga en cada llugar, en cada momentu y delantre de cada auditoriu col oxetivu de caltener el poder que tantos trabayos-y costó algamar. Y güei, mañana y pasao lo que-yos convién, nesta reforma estatutaria como na anterior, a él y al PSOE, ye dicir que la oficialidá ye una imposición que quier obligar y non un derechu humanu. La incoherencia nunca enxamás dexará de ser política, anque pueda ser políticamente incorrecta y se tenga qu'esconder. A ver quién ye quien a da-y la vuelta, porque ser y nun ser al tiempu ye imposible.