Atrás PDF
El Conseyu Consultivu acaba emitir el so informe coles recomendaciones pa la presunta reforma del Estatutu d’autonomía asturianu. Cuidáu, que l’informe nun ye denguna tontería. Son 166 páxines y suponse que tien detrás una carga importante de trabayu y reflexón. Nun lo duldo. Y van ver cómo el nuestru gobiernu tampoco. En realidá, el nuestru gobiernu va usalu como argumentu d’autoridá. “Nun lo digo yo”, van aneciar, “recomiéndalo’l Conseyu, que son xente mui preparao”. Miéu me dan estos tresvases de responsabilidá. Qué quieren que-yos diga. Esto ye un informe dirixíu. Un informe que, con verborrea xurídica, apunta les soluciones polítiques que, depués, van querer vender como “les úniques técnicamente posibles”. O “les meyores técnicamente posibles”. Van velo.
Por dir a casos concretos. Na denominación de la propia comunidá autónoma, cito textualmente, el Conseyu “inclínase por caltener esti enunciáu constitutivu (comunidá histórica), ya que na Constitución española, xurídicamente, nun s’estrema ente “nacionalidá” y “rexón”. Bien. El Conseyu “inclínase”. Incluso retorcigañando la Constitución. Porque, señores, la Constitución española establez claramente que les autonomíes, una de dos: o son nacionalidaes o son rexones. Y nun dexa llugar a otres denominaciones. Repito: o nacionalidá o rexón. ¿Y cuala ye la solución del Conseyu Consultivu?. Pues nin nacionalidá nin rexón; Asturies ha ser comunidá histórica. Estupendo. Acabamos de consolidar una tercer vía nominativa al marxe de la Constitución. Nosotros, que la queremos tanto...
En fin. Por el contra, n’otros asuntos menos mediáticos, el Conseyu apunta soluciones interesantes: el presidente nun ha ser diputáu; los diputaos nun han ser 45 como máximo sinon como mínimo; la Xunta pue disolvese en determinaos casos... Como digo, técnicamente impecables y políticamente razonables. Pero llega la cosa del idioma y vuelve’l miéu escénicu. Vuelve otru intentu llamentable por nun ofender al promotor del informe. Ello ye; al gobiernu. Y vuelve el doble llinguaxe ente la cosa xurídica y la opinática social. L’asuntu empieza con una obviedá. Vuelvo citar textualemente: “El bable podría ser declaráu cooficial si asina lo dispuxera l’Estatutu”. Gracies. Eso ya lo sabíemos. ¿Pero convién facelo o non?; ¿a onde s’inclina’l Conseyu?; ¿convién adaptase d’una vuelta a la Constitución que diz que “les demas llingües españoles habrán ser oficiales sigún los sos estatutos”, o equí tamién vamos siguir aneciando nuna tercer vía?. Pues, ya-yos lo adelanto: l’informe nun propón soluciones, como n’otros apartaos, sinón más problemes. Porque en cuenta centrase no xurídico, navega ente dos agües hasta que termina entrando na opinática barata diciendo que “una parte non pequeña de la sociedá considera que la normalización, de facese, diba ser puru artificiu”. “Puru artificiu”. Claro, non como los matrimonios homosexuales que son un auténticu clamor social. Ensin comentarios.