Atrás PDF (ES)
BOPA Nu (...). (...)
Los artículos 4 y 10 del Estatutu d’Autonomía del Principáu d’Asturies preven la protección, usu y promoción del bable, asina como la promoción de les manifestaciones culturales autóctones.
Nesti sentíu, la Llei 1/98, de 23 de marzu, d’usu y promoción del bable/asturianu, desendolcó l’Estatutu d’Autonomía no tocante al bable/asturianu como llingua tradicional d’Asturies y, al respeutive de la toponimia, establez que los topónimos d’Asturies han tener la denominación oficial na so forma tradicional, atribuyendo al Conseyu de Gobiernu del Principáu d’Asturies la competencia pa determinar los topónimos de la Comunidá Autónoma, ensin perxuiciu de les competencies municipales y estatales y conforme a los procedimientos que reglamentariamente se determinen nel desendolcu de la Llei, previu dictame de la Xunta Asesora de Toponimia del Principáu d’Asturies.
Ye por eso polo que, n’atención a la importancia induldable que los topónimos tradicionales asturianos tienen como parte del nuesu patrimoniu cultural, cola fin d’iguar el procedimientu apropiáu pa dar cumplimientu al mandatu recoyíu na mentada Llei 1/98 y considerando tamién que nestos momentos tiénense los conocimientos y datos necesarios pa restablecer de manera efeutiva les formes toponímiques tradicionales asturianes, abulta aconseyable regular mediante’l presente Decretu’l procedimientu pa determinar los topónimos de la Comunidá Autónoma.
En virtú d’ello, y a propuesta del Conseyeru d’Educación y Cultura, en cumplimientu de lo dispuesto nel artículu 15.2 de la Llei 1/98, de 23 de marzu, d’alcuerdu col Conseyu d’Estáu y previu alcuerdu del Conseyu de Gobiernu, na so xunta de 18 de xunetu de 2002,
DISPONGO
Artículu 1.- Oxetu.
1. Ye oxetu del presente Decretu la regulación del procedimientu pa la recuperación de los topónimos de la Comunidá Autónoma.
2. El Conseyu de Gobiernu, previu dictame de la Xunta Asesora de Toponimia, ha determinar mediante Decretu los nomes oficiales de los conceyos, les sos capitales, parroquies rurales y núcleos de población.
Artículu 2.- Aniciu.
Los espedientes pa la determinación de topónimos aniciaránse por resolución del titular de la Conseyería d'Educación y Cultura, d'oficiu o a instancia del conceyu o parroquia rural.
Artículu 3.- Dictame.
1. La Xunta Asesora de Toponimia dispondrá d'un plazu de dos meses pa emitir el dictame correspondiente, plazu que se podrá enanchar, nel so casu, tres pidimientu razonáu de la Xunta Asesora de Toponimia, ensin que de nenguna manera'l plazu, incluyida la prórroga, puea perpasar los tres meses.
2. El dictame tendrá de recoyer en tou casu una valoración de la propuesta unviada y, nel supuestu de que la mesma seya negativa, apurrir la solución que-y abulte más axeitada, ensin qu'en nengún casu puea abstenese d'emitir la mentada valoración.
Artículu 4.- Audiencia a les Entidaes Locales.
1. En recibiendo'l dictame de la Xunta Asesora de Toponimia , el Conseyeru d'Educación y Cultura treslladará lo actuao nel espediente a les Entidaes Locales a les qu'afeute l'espediente, que van tener el plazu d'un mes, contando dende'l momentu en que-yos aporten les actuaciones, pa manifestar la so conformidá o disconformidá cola propuesta.
2. Si la entidá local nun manifiesta'l so paecer nel plazu conseñáu, entenderáse qu'esiste conformidá cola propuesta y va siguise cola so tramitación, dando por cumplíu'l trámite d'audiencia.
3. Si la entidá local manifiesta disconformidá cola propuesta, l'espediente completu va unviase otra vuelta a la Xunta Asesora de Toponimia, qu'emitirá informe razonáu de los topónimos cuestionaos, nel plazu d'un mes.
Artículu 5. Resolución.
1. En viendo l'espediente tramitáu y en valorando los dictames de la Xunta Asesora de Toponomía, arriendes de los informes de les entidaes locales interesaes, el Conseyu d'Educación y Cultura treslladada al Conseyu de Gobiernu la propuesta de Decretu pa la determinación de los topónimos correspondientes.
2. Desque entre en vigor el mentáu Decretu, les denominaciones o topónimos que recueya tendrán la consideranza de denominaciones oficiales.
3. Magar lo afitao nos apartaos anteriores, si la determinación del topónimu supón alteriamientu del nome oficial del Conseyu, tendrá que tramitase l'espediente d'acordies colo dispuesto nos artículos 14 de la Llei 7/1985, de 2 d'abril, Reguladora de les Bases del Réxime Local y 11 del Testu Refundíu de les disposiciones vixentes en materia de Réxime Local, aprobáu por Decretu Llexislativu 781/1986, de 18 d'abril.
Disposiciones finales
1. Autorízase al Conseyeru d'Educación y Cultura pa dictar les disposiciones necesaries pal desenvolvimientu d'esta norma.
2. El presente Decretu va entrar en vigor el día siguiente al del so espublizamientu nel BOLETÍN OFICIAL del Principáu d'Asturies.
Dao n'Uviéu, a dieciocho de xunetu de dos mil dos.
El Presidente del Principáu, Vicente Álvarez Areces.
El Conseyeru d'Educación y Cultura, Javier Fernández Vallina.