Atrás PDF
Cuando, nel Entamu de la Carta Europea de les Llingües Rexonales o Minoritaries, los Estaos miembros del Conseyu d’Europa declaren ser “Conscientes del fechu de que l’amparu y espardimientu de les llingues rexonales o minoritaries nos estremaos países y rexones d’Europa representen una contribución importante na igua d’una Europa afitada nos principios de la democracia y de la diversidá cultural” y que por ello “el drechu a emplegar una llingua rexonal o minoritaria na vida privada y pública constituye un drechu imprescriptivu, de conformidá colos principios conteníos nel Pautu Internacional de los Drechos Civiles y Políticos de les Naciones Xuníes, y acordies col espíritu del Conveniu Européu pa la Protección de los Drechos Humanos y de les Llibertaes Fundamentales”, y cuando, de la parte de so, nel Entamu de la Constitución, “La Nación española, naguando por asitiar la xusticia, la llibertá y la seguridá y promover el bien de los que nella s’inxerten, proclama la so voluntá de protexer a tolos españoles y pueblos d’España nel exerciciu de los drechos humanos, les sos cultures y tradiciones, llingües ya instituciones”, ta dexándose preclaro qu’España en particular y Europa en xeneral, declaren como drechu cimeru -sofitu del so ordenamientu xurídicu y col mesmu valir que cualquier otru de los drechos humanos- el que tien la ciudadanía a emplegar na vida privada y pública la so llingua llariega. Consecuencia d’ello ye que la mesma Constitución española, nel so artículu 3, proclama, en xunto cola oficialidá estatal del castellán, la cooficialidá de les demás llingües españoles nes respeutives Comunidaes Autónomes.
Poro, que un ciudadán o un ciento dellos anden esparciendo perdayuri que tan a la escontra de la oficialidá de la llingua asturiana porque ye un contuberniu xudeú-masónicu pa cebar al nacionalismu o, cenciellamente, porque-yos sal de les ñarices, vien a ser lo mesmo que si glayaren tar a la escontra de la llibertá d’asociación o de la d’espresión, colos mesmos “argumentos” (por llamalos dalguna manera). Al cabu, dengún problema, porque ye tal la grandura de la llibertá, de la democracia y tamién de la Constitución española que mesmamente hai sitiu nelles pa los individuos que les arrenieguen. Pero si’l coriféu y la so compaña rersulten ser xente del rellumón, cargos públicos obligaos a respetar y facer respetar a la Constitución, la cosa garra mala pinta, bastante pa qu’entamen a sentise delles turulles d’alarma.
La Xunta Xestora del Aconceyamientu de Xuristes pol Asturianu.