L'usu de la llingua polos emplegaos públicos de Xusticia
Xabiel Álvarez VillaAtrás PDF
Bastó que la Conseyería de Xusticia ficiera un mínimu xestu pa dignificar l'usu de la llingua asturiana y, de pasu, garantizar el drechu llegal de les emplegaes y emplegaos públicos recién tresferíos a la Comunidá Autónoma a presentar dalgunes solicitúes de permisos p'asuntos propios nesta llingua ante l'Alministración asturiana, si asina yos pete, pa que un sindicalista de la UXT, d'esi sector, esbarriare con afirmaciones tan inciertes como atrevíes sobre imposiciones y supuestes nulidaes, que sólo s'asitien na so mollera.
Porque equí, frente a lo que diz el mentáu sindicalista, nada nun se ta imponiendo a naide. Cenciellamente, lo que fizo la Conseyería ye poner a disposición de los trabayadores dos modelos normalizaos de la mesma solicitú, ún en castellán y l'otru n'asturianu, pa que puedan escoyer llibremente cuál d'ellos quieren emplegar, dándo-yos asina la posibilidá d'exercitar un drechu que–yos reconoz l'artículu 4 de la Llei 1/98, de 23 de marzu, d'usu y promoción del bable/asturianu, en relación col artículu 36.2 de la Llei 30/92, de 26 de payares, de Réxime Xurídicu de les Aliministraciones Publiques y del Procedimientu Alministrativu Común, los artículos 4 y 10.1.21 del Estatutu d'Autonomía d'Asturies, la Carta Europea de les Llingues Rexonales o Minorizaes y el propiu Plan pa la normalización social del asturianu, robláu por tolos grupos políticos presentes na Xunta Xeneral del Principáu d'Asturies.
Lo que sí ye una imposición y una torga inadmisible al drechu al emplegu de la llingua asturiana ye imponer dafechu l'usu de modelos normalizaos namás en castellán.
Como camentamos que la postura oficial del sindicatu UXT nun ye otra que la del respetu a la llingua y los drechos de los sos falantes, nun taría de más qu'aclariara les coses col so representante nel sector de la Xusticia asturiana, anque na más seya pa formalu nel respetu de los drechos básicos de los trabayadores a los que representa.