Dictame
sobro criterios de preferencia ente materies optatives y la de “Llingua
Asturiana y Lliteratura” nel Bachilleratu
Emitíu a pidíu de les profesores de Llingua
asturiana y lliteratura del IES Asturies de Llugones, Beatriz Fernández Cuesta
y Monserrat García Fueyo
1. EL PROBLEMA PLANTEGÁU.
L’artículu
9 del Decretu 75/2008, de 5 d’agostu, pol que s’aprueba’l currículu de
Bachilleratu nel Principáu d’Asturies, desarrolláu per Resolución de 4 de
marzu de 2009, de la Conseyería d’Educación y Ciencia, establez un mínimu
de cinco asignatures optatives que puen ser delles más acordies colo que caún
de los centros determine al respeutu. Nos mentaos Decretu y Resolución, a la
materia de “Llingua asturiana y lliteratura” dase-y la condición
d’optativa.
Al
facer la matrícula, los alumnos tienen qu’escoyer la materia o materies
optatives que-yos preste poniendo nel impresu más d’una y per orde de
preferencia y, acordies con ello, el centru determinar que optatives van dase y
cuáles non tomando en cunta los criterios seleutivos darréu, conteníos nel
artículu 8 de la mentada Resolución de 4 de marzu de 2009:
a)
Algamar grupos d’ocho alumnos nel conxuntu de tol cursu (primeru o segundu de
Bachilleratu), seya cual fore la estremada modalidá siguida polos alumnos, pa
les materies de Llingua y lliteratura asturiana I y II, Segunda llingua
estranxera I y II y Teunoloxíes de la Información y la Comunicación.
b)
Algamar grupos d’ocho alumnos, dientro de caúna de les modalidaes del
Bachilleratu, pa les optatives Proyeutu d’investigación integráu y de la
modalidá escoyida como optativa pol centru, y n’entrambos los dos
casos, “siempres que se pretenda constituyir como grupu independiente de la
materia de modalidá propiamente dicha”.
c)
Pa les demás optatives desíxense grupos mínimos de 15 estudiantes.
d)
Esceicionalmente pue rebaxase’l númberu mínimu d’escolinos necesarios pa
perfacer grupu d’optativa.
El
problema pue xurdir cuando hai pidimientu de delles optatives que cumplen col
requisitu de númberu (ordinariu o esceicional) establecíu y nun puen impartise
toes por mor de que l’artículu 8.c) de la Resolución de de 4 de
marzu de 2009 llenda’l númberu de grupos d’asignatures optatives al del los
grupos ordinarios multiplicáu per coeficiente 1,5 .
¿Qué
criteriu seleutivu tien d’acoyer el centru pal casu de que’l númberu de
grupos d’asignatures optatives posible pase de la cifra máxima llegalmente
permitida?. ¿Qué principiu eliminatoriu tien de siguir?.
Énte
esta hipótesis, el claustro de profesores del IES Asturies de Llugones plantégase
esta alternativa:
1ª
opción: dar preferencia a los grupos qu’escueyan cualquier optativa
valoratible nes pruebes d’accesu a la universidá o esixida pa poder siguir
otros estudios superiores.
2ª
opción: dar preferencia acordies al númberu d’alumnos de los grupos.
2. FUNDAMENTOS DE DRECHU.
2.1. LA PRIMERA DE LES OPCIONES PLANTEGADA NUN TIEN SOFITU LLEGAL DALU.
L’artículu
9.4 del Decretu 75/2008, percitáu, establez como únicu criteriu seleutive’l
numbéricu. Poro, la pretensión de dellos profesores d’imponer un criteriu
cualitativu –más o menos atrautivu pero ayenu dafechu a la llegalidá- nun ye
de recibu porque nun se pue sustiyir la voluntá llegal pela d’un garapiellu más
o menos grande de ciudadanos obligaos a cumplir la norma. Arriendes dello tala
propuesta fai una mecigaya coles tres estremaes modalidaes d’asignatures
optatives (descrites nos lliterales a, b y c del separtáu 1 d’esti informe)
lo que tamién va a la escontra dafechu del mandáu llegal.
Ello
quier dicir que namás pue emplegase’l criteriu numbéricu na seleición
d’asignatures optatives.
2.2. SOBRO LA CONDICIÓN LLEGAL ESTRAORDINARIA DE L’ASIGNATURA DE LLINGUA ASTURIANA.
D’otra
miente, l’asignatura de llingua asturiana nun tien la simple condición de
materia optativa en sentíu estrictu. Ciertu que nun ye obligatoria, porque
asina lo determina l’artículu 10.1 de la Llei 1/1998, de 23 de marzu, d’usu
y promoción del bable/asturianu (“respetando la voluntariedá del so
deprendimientu”) y nesi sen, gramatical (optar: decidise por daqué que
s’escueye ente delles posibilidaes), bien pue dicise que ye optativa. Pero namás
neso coincide la materia de llingua asturiana coles otres optatives recoyíes
nel artículu 9 del Decretu 75/2008, porque nes demás carauterístiques
consustanciales a les materies optatives comunes, la de llingua asturiana nun
participa.
Asina,
a la materia de Llingua asturiana nun pue imponese-y restricciones por mor del númberu
d’alumnos que la escueyan, porque pa ella nun cunten les disposiciones
reglamentaries al respeutu (artículos 9.4 del Decretu 75/2008 y 8 de la
Resolución de 4 de marzu de 2009, de la Conseyería d’Educación y Ciencia)
porque la desixencia de grupu mínimu pa impartila ye contraria a lo dimpuesto
nuna norma con rangu superior, l’artículu 10.1 de la Llei 1/1998, que nun pon
llende dala, nin numbérica nin d’otra frasca, a la obligación de
“garantizar l’enseñu del bable/asturianu en tolos niveles y graos”,
siendo asina qu’onde la llei nun discrimina nun pue facelo nin el reglamentu,
nin l’autoridá educativa que lu dicta, nin los tribunales de xusticia,
aminorgando asina l’exerciciu d’un drechu, nesti casu’l de los escolinos a
deprender la so llingua llariega, reconocíu, non solo na Llei Autonómica sinón,
y nada menos, nun tratáu internacional ratificáu por España -máxima espresión
llexisllativa acordies col artículu 96 de la Constitución española- como ye
la Carta Europea de les Llingües Rexonales o Minoritaries, artículos 7.1.f) y
10.
Tampoco
comparte l’asignatura de llingua asturiana, con les optatives que venimos
denomando del común, la condición de materies esfronaes pente so, nel intre
d’escoyer unes y escartiar otres, porque pa los estudiantes que escueyen la
materia de llingua asturiana “el so deprendimientu nun podrá torgar que
reciban la mesma formación y conocimientos n’igualdá de condiciones que’l
restu del alumnáu” (artículu 10.3 de la Llei 1/1998), lo que-y quita a
l’asignatura de llingua asturiana la condición de competitiva con otres
materies optatives (la escoyeta d’una elimina la posibilidá d’otra) que sí
tienen toles demás.
3. CONCLUSIONES.
1ª.
Talu qu’establez l’artículu 10 de la Llei 1/1998, l’Alministración del
Principáu d’Asturies tien de garantizar la materia de llingua asturiana a
tolos estudiantes que voluntariamente la soliciten ensin qu’ello signifique
torga dala pa recibir la mesma formación y conocimientos que’l restu
l’alumnáu, n’igualdá de condiciones.
2ª.
Les disposiciones rellatives a grupos mínimos en materies optatives y seleición
de los mesmos nel so casu, establecíes nel Decretu 75/2008 y na Resolución de
4 de marzu de 2009 de la Conseyería d’Educación, tienen d’aplicase
dende’l respetu dafechu a lo establecío nel artículu 10 de la Llei 1/1998.
3ª.
Si se incumpliere el requisitu anterior, aplicándo-y a las materia de llingua
asturiana les mesmes llendes de númberu mínimu d’alumnos y de competencia,
propies de les asignatures optatives comunes, conculcaríase’l principiu de
xerarquía normativa proclamáu nel artículu 9.3 de la Constitución y
desarrolláu pelos artículos 51 y 62 de la Llei 30/1992, de 26 de payares, de Réxime
Xurídico de les Alministraciones Públiques y del Procedimientu Alministrativo
Común, el primeru declarándolu y el segundu condergando a la nulidá de plenu
drechu a los actos que nun lu respeten.
Llegáu
esti casu les persones llexitimaes (estudiantes o representantes llegales de los
mesmos, si son menores d’edá; profesores de llingua asturiana; y sindicatos
de la enseñanza, pente otres persones xurídiques posibles) podríen interponer
recursu d’alzada, énte’l Conseyeru d’Educación y Ciencia, escontra
l’actu del IES, nel plazu d’un mes dende que se notificó, y escontra lo
qu’esti resuelva demanda énte’l Tribunal Superior de Xusticia d’Asturies,
nel plazu de dos meses
El
presente dictame fízolu gratuitamente l’Aconceyamientu de Xuristes pol
Asturianu a pidíu de les profesores de Llingua asturiana y lliteratura del IES
Asturies de Llugones, Beatriz Fernández Cuesta y Monserrat García Fueyo, roblándolu
Xurde Blanco Puente ponente del mesmu.