Interpretación del Instrumentu de Ratificación por España de la Carta Europea de les Llingües Rexonales o Minoritaries

Aconceyamientu de Xuristes pol Asturianu
DATA: 20/02/09

Pente medies de la so Directorate General IV (Educación, Culture and Heritage, Youth and Sport), el Conseyu d’Europa vien d’acusar recibu del Quitu Informe unviáu pel Aconceyamientu de Xuristes pol Asturianu, testu qu s’axunta na so versión orixinal n’asturianu y torna al inglés, que-y debemos al procuru y arrogancia de doña Birgitta al Issa y don Féliz Fernández.

Trátase d’un trabayu téunicu nel que se razona y demuestra qu’acordies cola única interpretación posible del Instrumentu de Ratificación de la Carta Europea de les Llingües Rexonales o Minoritaries robláu por España, les sos autoridaes tan obligaes a xustificar énte’l Conseyu d’Europa les razones del incumplimientu de la parte III de la Carta no que cinca a la llingua asturiana. Asina, nel so prósimu informe (previstu pal añu 2010), el Gobiernu español tendrá de dar cuenta y razón al Conseyu d’Europa de por qué  nun tien prevista una educación preescolar, primaria, secundaria, profesional y universitaria, n’asturianu; por qué los muérganos xurisdiccionales nun garanticen l’emplegu del asturianu nos procesos penales, civiles y contencioso-alministrativos; por qué les autoridaes alministratives nun fomenten l’emplegu de la llingua nel marcu de les alministraciones y servicios públicos; por qué nun se garantiza una televisión pública n’asturianu; por qué nun se-y da sitiu a la llingua asturiana na política cultural nel estranxeru (Institutu Cervantes, por exemplu); por qué nun s’ufre información n’asturianu dientro los hospitales y asilos;  por qué nun  se redauten n’asturianu les instrucciones de seguridá; o por qué nun se facilita l’averamientu ente los falantes asturianos de les estremaes comunidaes autónomes españoles nes que se fala la llingua y ente éstes y la fastera portuguesa na que tamién se fala; ello, pente otra bayura d’incumplimientos inxustificaos y, pal Aconceyamientu de Xuristes pol asturianu, inxustificables.

N’Uviéu, a 20 de febreru de 2009.
Aconceyamientu de Xuristes pol Asturianu.

Arriba    Atrás    PDF