Atrás     PDF

A la vista de la «reformina» del Estatuto d´Autonomía que nos regala la clase política asturiana, quería ufrir públicamente a los políticos d´Asturies unes reflexiones que m´inspiró especialmente l´apartáu correspondiente al asturiano. Con elles quiero contribuir a la puesta en marcha del mentáu artículu suxiriendo dalgunos pasos a seguir pa que seya daveres l´asturiano esi «patrimonio cultural» col que se define.

Lo que tendríen que facer p´algamar l´oxetivu ye encargar una bona «vitrina» pal asturiano. Voi esplicar agora por qué y qué característiques tien que tener.

1.º Una vitrina val lo primero de too pa conservar lo que hai dientro y conservalo sin contaminaciones del esterior. Creo qu´encaxa perfectamente con ún de los oxetivos de la so política llingüística. L´asturiano nin tocalu, nada de neoloxismos, nada d´usalu na Alministración, d´escribir sobre temes científicos o d´actualida! l´asturiano valdrá pa falas de coses íntimes y mui na intimidá, como dellos proponen últimamente na prensa. A ser posible que nun mos oya nin el vecín, nun vaya ser que rompamos l´encantu d´un falar tan melgueru.

2.º Una vitrina tien como fin que la xente pueda ver lo que hai dientro y almiralo. Esto va muncho además col caráuter de los asturianos, podremos enseñalo a los vecinos, a los de fuera, y alimentar el «grandonismu» diciendo «mirái lo que tenemos», eso sí, nun pensamos usalo nin sacalo de la so tumba de cristal, pero ahí ta, y pa detrás, pa demostrar que eso qu´enseñamos ye algo único, tien de poner en lletres bien grandes «bable», casu únicu y especial de llingua, perdón «patrimonio cultural», que nun recibe el nome del pueblo que lo fala o del so territoriu ¡qué ye eso de llamalo asturiano!

3.º La vitrina ha de ser grande porque ye necesariu un furaquín pa cada ún de los munchos bables. Suxero que si nun hai alcuerdu sobre el so númberu, entre tres y tres mil, quién sabe, s´aconceye una comisión de sabio, n´Asturies hai asgaya, pa determinar esti asunto. Los «amigos de los bables» puen char un gabitu nesti llabor. Pido-yos perdón nesti puntu porque sólo escriba n´un de los munchos bables, pero el periódicu nun tenía espaciu abondo pa trascribir esta carta en tolos qu´esisten.

4.º Llegamos a un punto conflictivu, la ubicación. Pensé de primeres nel Museo del Jurásico, los inquilinos nun puen volver a dar guerra, ¡qué meyor pal asturiano!, pero pensándolo meyor y dempués de que me pasaran pela mente el Museo Arqueológico o el de Bellas Artes, paezme que el sitiu meyor seya la Universidá. Dalgún requexu habrá, val de pasu pa que quitar les telarañes de dalguna sala y permitirá el so estudiu. Eso sí, hai que curiar que tea debidemente separada de los departamentos de llingües modernes, nun vaya ser que sienta daquien la tentación de confundilo con una llingua nacional y yá sabemos que «Asturias es España y lo demás tierra conquistada».

Dempués d´escribir este llinies siéntome meyor ciudadanu, faigo esto de manera desinteresada naturalmente. Nun fai falta que me den les gracies, señores políticos, too sea pa quita-yos esti dolor de cabeza que ye la reivindicación del asturiano, y puedan seguri enfotaos en solucionar los problemes «reales» de los asturianos, como a diario vemos que faen. Per otru llau, corten pelo sano y eviten que puedan llegar aquí los problemes d´otres comunidaes autónomes conflictives, val más prevenir que curar, y d´esta miente son pioneros no que podemos llamar «política llingüística preventiva», que consiste en nun conceder los mínimos, véase oficialidá, por si acaso.
Al mesmu tiempu, y puesto que lo que ta n´una vitrina nun debe ocupar más d´una llinia nos planes d´estudiu, los nuesos estudiantes puen seguir afondando nel estudiu d´otres llingües. Como la mayoría d´asturianos nun dedicó nin un minutu al asturiano enxamás podemos comprobar «l´altísimu dominiu» de llingües estranxeres que les estadístiques dicen que tenemos (nesti puntu ta permitío sonreír).

Si necesiten dalguna collaboración más, puen cuntar conmigo. Gustosamente cederé el mio tiempu y un poco de tinta de impresora si ustedes, col visto bueno de los sos superiores de Madrid, naturalmente, soliciten los mios servicios.