Atrás     PDF

POLA fuerza de la llei quier el xurista y funcionariu Xurde Blanco que los asturianos tengamos derechu a usar el nuestru idioma en tolos ámbitos de la vida y, especialmente, nes relaciones coles administraciones públiques. Pa ello, tien entamaos pleitos col Gobiernu asturianu por nun-y almitir escritos en llingua asturiana, encontándose ésti en que nun ye un idioma oficial. Ye'l d'esti funcionariu un enfotu pa emponderar: primero, pola fe ciega na llei como instrumentu qu'apurre derechos a los ciudadanos; segundo, pola soledá (fuera d'unos cientos o, si se quier, miles de persones) en que lu dexa la sociedá nel determín de que se-y respete un derechu humanu fundamental. Si llega ser n'otru llugar del mundu cualisquiera, el fechu simple y llanu de qu'un Gobiernu torgue a un individuu la posibilidá d'usar la so llingua per escrito fadría blincar de los sillones a los líderes mediáticos, prendería les calderes de les ONG y sacaría a la cai a la meyor grana de les organizaciones d'izquierdes. Equí non, esto ye Asturies. Pero, con independencia de lo que pase colos recursos xudiciales, cola consulta d'un xuez a propósito de la constitucionalidá de la llei o col amparu que Xurde Blanco seya quien a alcontrar nos tribunales, convién recordar cómo ye que tenemos una Llei d'Usu y Promoción del Asturiano y el camín tan abegosu, cuestu y difícil que llevó al so nacimientu.

Lo primero, recordar que'l testu, la so redacción, espíritu y materialización al cabu como llei foi un llabor del asturianismu representáu pol parlamentariu Xuan Xosé Sánchez Vicente, que llogró tan increíble fitu en soledá política total na Xunta Xeneral. Ye güei tovía difícil camentar cómo un solitariu diputáu asturianista, por más que la matemática parlamentariu lu ficiera mui valoratible, fue quien a arrincar a una representación política tan contraria l'aprobación d'unes disposiciones que dan tantos instrumentos al gobernante que los quixere emplegar. Namás la curiosidá d'aquel diputáu y la bona disposición del entós presidente, Sergio Marqués, lo pueden esplicar.

Segundo, recordar que la llei aprobóse contra la manifiesta o zorramplona enemiga de la izquierda asturiana, mesmo del PSOE que d'IU, que ficieron, unos y otros, tolo que pudieron pa torgar, retrasar o falsiar el proyectu de llei. Enredando colos trámites parlamentarios, utilizando a los lletraos de la Cámara pa cuestionar la constitucionalidá de la propuesta (esti articulista foi testigu), proponiendo enmiendes que la desfiguraben y buscaben facela inútil dafechu, o votando contra ella cuando yá nun tenía remediu la so aprobación, que, contra lo que dellos dicen agora, nun foi por unanimidá. Tamién s'aprobó la llei (¿pueden creyelo!) contra la manifiesta enemiga d'una parte del nacionalismu asturianu, que, daquella, acusaba al testu, al tiempu, de ser insuficiente (por nun garantizar los derechos de los falantes) y de ser inconstitucional (por pasase de rosca y contener elementos de la cooficialidá). El casu yera nun facer nada.

Tercero, la llei contién, a lo menos, tres previsiones o mandatos que, de por sí, diben desapovisar bona parte de les reivindicaciones llingüístiques d'un soplíu si un Gobiernu tuviere l'aquél de cumpliles: la obligación d'atender a los ciudadanos n'asturiano nes sos relaciones cola administración (art. 3.2), la restitución de los topónimos asturianos tradicionales (art. 8.2) y la obligación d'ufiertar la enseñanza de la llingua asturiana en tol sistema educativu, ensin discriminaciones (art. 10.1 y 10.3). Nenguna d'estes obligaciones llegales, güei, se cumplieron, y vamos aportar a los diez años de l'aprobación de la llei.

¿Tanta xera, pa nada? ¿Tantos trabayos pa quedar como tábemos? Munchos pensamos que non, que, como yá advirtiéramos daquella, ésti ye l'únicu gavitu onde colgar les aspiraciones individuales de los derechos llingüísticos de los asturianos y que tien traces de selo pa munchu, munchu tiempu. Y más importante entá, que ye un milagru que se llograra arrincar una regulación asina a unos políticos tan ayenos a la tierra y a los ciudadanos que los voten. La engarradiella de Xurde Blanco colos tribunales llevará tiempu y puede acabar de cualquier manera, pero eso nun quita pa que del añu 1998, cuando s'aprobó la Llei del Asturianu, a estos díes, con quexes o ensin elles, queriendo o ensin querer, ési ye l'únicu instrumentu llegal concretu, palpuñable y visible col que podemos almorzar toles mañanes pa siguir desixendo los nuestros derechos.