El 25 de mayu del añu 2006, día perseñaláu pa los asturianos, constituyóse formalmente n'Uviéu l'Aconceyamientu de Xuristes pol Asturianu (AXA), cola firma l'acta fundacional y la solicitú d'asentamientu nel Rexistu d'Asociaciones del Principáu d'Asturies. El muérganu provisional de gobiernu confórmáronlu:

Xosé María Estrada Janáriz, Lletráu del Serviciu Xurídicu del Principáu d'Asturies (Presidente)
Xurde Blanco Puente, Lletráu del Serviciu Xurídicu del Principáu d'Asturies (Secretariu-Alministrador)
Xesús Xabiel Álvarez Villa, Xefe del Serviciu de Xusticia del Menor del Principáu d'Asturies (Vocal-Tesoreru)

L'Asociación foi fundada cola finalidá de trabayar de forma desinteresao pol desaniciu de les torgues que tien l'emplegu la llingua asturiana n'actividá profesional de los xuristes y esi trabayu plategóse, yá d'aniciu, dende estos tres presupuestos:

1ª. La dignidá institucional d'Asturies -la dignidá, al cabu, de tolos asturianos-, desixe que la so llingua reciba'l mesmu tratu que les llingües propies d'otres Comunidaes Autónomes españoles.

2ª. Tolos poderes públicos, pente ellos los asturianos, tan obligaos a cumplir llealmente colos mandaos recoyíos nos artículos 3.2, 9.2 y 14 de la Constitución Española y nel artículu 2 de la Declaración Universal de los Drechos Humanos, a la lluz de los trataos, convenios, pautos, convenciones, resoluciones, informes, declaraciones y sentencies que los interpreten.

3ª. Tolos poderes públicos asitiaos n'Asturies tan obligaos a cumplir llealmente colos mandaos recoyíos nel artículu 4 del Estatutu d'Autonomía y na Llei 1/1998, de 23 de marzu, d'Usu y Promoción del bable/asturianu.

4ª. Los firmantes del "Plan pa la Normalización Social del Asturianu 2005-2007", tan obligaos a cumplir llealmente los sos compromisos.

Anguaño, integren AXA más de mediu centenar de xuristes, ente los que s'atopen representaes cuasi toles estayes profesionales: Universidá, Alministración Autonómica y Municipal, Notariáu y Abogacía.

AXA convida a integrase nella a los más de los xuristes posibles. Cuidamos que'l mirar pola llingua propio y los derechos de los sos falantes, trabayando al cabu pola so dignificación y salvaguarda, ye un llabor del que dengún xurista asturianu habría desertar.