Atrás     PDF

Xosé María Estrada Janariz, ciudadán titular del DNI númberu (...), no so condición de Presidente del Aconceyamientu de Xuristes pol Asturianu (AXA), asitiáu a efeutos de notificaciones nel séptimu pisu, del númberu 22, cai Pérez de la Sala, d'Uviéu, preséntase y DIZ:

El BOPA de 8 de xunu del añu qu'andamos, asoleya la so resolución de 23 de mayu, pola que se convoca a los interesaos a participar na seleición de tres places de Lletraos, estableciendo na base tercera que "Quienes deseen tomar parte en el proceso selectivo formularán su solicitud ajustada al modelo que figura como anexo III", modelu ésti ufiertáu namás con redaición en llingua castellana, torgando con ello a los usuarios la posibilidá d'exercitar un drechu que-yos reconoz l'artículu 4 de la Lley 1/98, de 23 de marzu, d'usu y promoción del bable/asturianu, en relación col artículu 36.2 de la Llei 30/92, de 26 de payares, de Réxime Xurídicu de les Alministraciones Publiques y del Procedimientu Alministrativu Común, los artículos 4 y 10.1.21 del Estatutu d'Autonomía d'Asturies y el Plan pa la Normalización Social del Asturianu.

Y, siendo asina, que l'asociación que presido ñació cola finalidá de contribuyir al desaniciu de les torgues que se ponen davezu al emplegu de la llingua asturiana n'actividá profesional de los xuristes; que'l muérganu que vusté preside tien de ser respetuosu cola llei y equidistante coles ideoloxíes; y que mal estrenu abulta la resolución mentada; ye polo que-y

ENCAMIENTO: Que dea les órdenes afayadices pa correxir lo que quiciás nun seya más qu'un erru, iguando l'afayadiza espublización nel BOPA y, al cabu, ufiertando'l modelu de solicitú, amás d'en castellan, n'asturianu, col envís de que'l ciudadán pueda escoyer el que más-y preste y exercitar asina'l drechu que tien reconocíu a dirixise a l'Alministración nuna u otra llingua.

Ye xusto.

N'Uviéu, a ventiún de xunu de dos mil seyes.