Ignacio Arias Díaz
Lletráu de la Xunta Xeneral del Principáu d'Asturies
Les Noticies, 11-06-00. Pp. 14
Atrás PDF
Con esti artículu, y por encargu de LES NOTICIES, empieza una serie dedicada a les costumes xurídiques asturianes. Nun ye la primer vez qu’esti selmanariu s’ocupa d’un asuntu d’esta naturaleza. Na edición correspondiente al 14 de mayu de 2000, publicábase un artículu sobre les actuaciones que ta llevando a cabu la Comisión de Drechu Consuetudinariu del parlamentu Asturianu. Nesti artículu, destacábase la posibilidá de que les costumes xurídiques vixentes y preesistentes a la Constitución pudieran elevase de rangu y pasar de fontes secundaries del ordenamientu xurídicu, esto ye, de fontes pa cuya eficacia s’esixe la invocación y prueba por parte de quien la postule, en fontes primaries del ordenamientu xurídicu, esto ye, en normes con rangu de llei que nun necesiten ser probaes.
A lo dicho ellí cabe añedir como introducción a esta serie d’artículos, que la Comisión de Drechu Consuetudinariu foi creada a finales de la llexislatura pasada a impulsu de los Lletraos del parlamentu nuna idea plasmada políticamente a partir d’una iniciativa del entós Diputáu del Partíu Asturianista Xuan Xosé Sánchez Vicente, a quien hai que reconocer la receptividá que tuvo sobre esti asuntu.
El fechu de que la Comisión se creara na pasada llexislatura nun significa que l’artículu 16 del Estatutu d’Autonomía del Principáu d’Asturies, a partir de cuyu conteníu cobra sentíu la Comisión (l’artículu 16 establez que «El Principáu d’Asturies impulsará la conservación y compilación del Drechu Consuetudinariu Asturianu»), s’incorporase na última de les reformes del Estatutu. El citáu artículu ya esistía, si bien non na so redacción actual, dende l’aprobación inicial del Estatutu. Ocurre, con too y con ello, qu’a partir de la Sentencia del Tribunal Constitucional 121/92, los Lletraos del Parlamentu percibimos les posibilidaes qu’ufierta esti artículu y vamos madurando a partir d’esi momentu la idea de dar cuerpu a un mecanismu que permita esplorar les sos posibilidaes n’orde a constatar la vixencia y algame de les costumes xurídiques asturianes.
Hai que tener en cuenta que’l Tribunal Constitucional na referida sentencia dixo que «L’ampliu enunciau d’esta ultima salveda (refierse’l Tribunal al articulu 149.1.8ª de la Constitucion, qu’atribúi al Estáu competencia esclusiva sobre "lexislación civil, ensin perxuiciu de la conservación, modificación y desarrollu poles Comunidaes Autónomes de los drechos civiles, forales o especiales, ellí onde esistan"), permite entender que la so remisión algama non solo a aquellos drechos civiles especiales que fueran oxetu de compilación al tiempu de la entrada en vigor de la Constitución, sinón tamién a normes civiles d’ámbitu rexonal o local y de formación consuetudinaria preesistentes a la Constitución».
Nesti marcu constitucional la cláusula estatutaria «conservación y, nel so casu, compilación» almite l’exerciciu de la potestá llexislativa.
Consecuentemente los trabayos que ta llevando a cabu la Comisión de Drechu Consuetudinariu, que nel momentu actual tán centrándose n’investigaciones n’archivos rexonales y nacional nos que se contenga documentación d’interés pa los trabayos de la Comisión, pero que nuna fase posterior algamará a los trabayos de campu através d’una encuesta que s’ellaborará cuidadosamente a partir d’estes investigaciones previes y d’encuestes anteriores, permitirán constatar la vixencia de determinaes costumes xurídiques asturianes, siempre preesistentes a la Constitución y, n’últimu términu, será’l Parlamentu Asturianu, al que se presentarán los trabayos una vez concluyíos, quien decida si estes costumes queden como tales y cenciellamente se conserven y compilen o, si pola so trescendencia o implantación xeográfica, se llexisla sobre elles elevándoles a rangu llegal.
Si esto ye asina, y como yá tuvi ocasión de dicir n’ocasiones anteriores, podríamos asistir a un cambiu importante na configuración de la nuestra autonomía.
Como ye sabío, los fechos diferenciales que marcaron asimetríes nel panorama autonómicu español foron orixinariamente y con calter xeneral la llingua cooficial y el derechu foral.
Nun ta claro que les costumes xurídiques territoriales que pueden dar llugar a un drechu especial puedan conformar unos fechos diferenciales col mesmu algame que los citaos. Pero yá se trate de fechos diferenciales a seques o fechos diferenciales menores –y hai que traer equí a colación al mio queríu compañeru y amigu Alberto Arce como acuñador d’esti términu-, lo que nun ufierta dulda nenguna ye que si se constata la vixencia de costumes xurídiques y se llexisla sobre elles, el Principáu d’Asturies dará un pasu más nel so camín hacia’l grupu de cabeza de les autonomíes del Estáu español.
En cuanto atañe al conteníu de la serie que güei empieza, afuximos de grandes planteamientos xurídicos y optamos por un calter divulgativu, acordies col mediu nel que se publica, que permita al llector captar la esencia de la costume ensin nengún esfuerzu.
Como quiera que los trabayos de campu de la Comisión de Drechu Consuetudinariu inda nun empezaron, pártese d’obres yá escrites, fundamentalmente de la Gran Enciclopedia Asturiana y de la obra de Francisco Tuero Bertrand, principalmente del so Diccionario de Derecho Consuetudinario e Instituciones y Usos Tradicionales de Asturias.
Puede constatase n’estes obre y n’artículos monográficos sobre’l particular, que los conteníos de les costumes constrúyense sobre la base de lo yá escrito por autores precedentes, de les propies vivencies personales nel mediu rural y, n’aquellos casos nos que les costumes dan orixe a litixos, a partir de les resoluciones xudiciales, pero falta un trabayu de campu rigurosu, minuciosu y actualizáu que constate la vixencia y ámbitu xeográficu d’implantación de les nuestres costumes.
En tanto esi llabor se lleva a cabu, hai que tomar como referencia les fontes yá indicaes, que se verán afectaes polo que resulte de los trabayos de la Comisión.
Nesta serie trátense les costumes a partir d’un orde alfabéticu que dexa a salvu cualquier xerarquización por orde d’importancia, ensin perxuiciu de que dalgunes d’elles, pola so importancia, polo indiscutible de la so vixencia o pola so implantación, s’aborden con más profusión.
Por razón d’esta obligadamente estensa introducción, namás podemos ocupanos nesta edición d’una costume. Coincide, non ostante, y por mera casualidá d’ordenación alfabética, que se trata d’una de les que meyor representen l’espíritu y la sensibilidá del pueblu asturianu.
L’ANDECHA.
L’andecha consiste na voluntaria, gratuita y mutua collaboración que se presta pa la realización de determinaos trabayos rurales o domésticos: recoyer y mayar la escanda, cuchu de tierres, construcción de cases, siega y recolección d’herba y similares. Propiamente, resérvase’l nome d’andecha a la cooperación prestada pa la recoyida del pan o escanda, teniendo les otres actividaes la so propia denominación: esfoyaza (facer riestres de maíz), segarata ( recolección de la herba), acarretu (tresporte de piedra).
Tradicionalmente, l’andecha taba formada por una filera de persones que debíen siguir ciertu orde nel so avance, anque, por rivalidá, dalguna entainara pa ser la primera en llegar al final de la heredá, una vez rematáu’l trabayu.
Esta persona, al terminar, llevantaba les sos últimes espigues y glayaba, manifestando asina el so trunfu, que n’ocasiones recompensábase cola cuayada –llechi cuayao servío en fueyes de figal-, y que tamién se daba a los demás.
Malhaya sea la cuayada
que comen los coyedores,
nin cantaron nin bailaron,
nin llenaron los macones.
Anguaño, l’andecha ta en franca decadencia, conservándose namás nún restrinxíu ámbitu familiar. El desarrollu económicu y la mecanización contribuyeron a ello.
Non obstante, anguaño reivindícase l’espíritu cooperativu de l’andecha como base esencial sobre la qu’ha llevantase’l campu asturianu: una andecha actualizada, con suficiente mecanización, que ye lo que los modernos economistes denominen "agricultura de grupu".