Ignacio Arias Díaz
Lletráu de la Xunta Xeneral del Principáu d'Asturies
Les Noticies, 01-10-00. Pp. 18

Atrás     PDF

PASTOR

Anque la ordenación de los pastos ye una competencia municipal, aplícase supletoriamente la Llei del Principáu 4/1989, d’Ordenación Agraria y Desarrollu Rural, con un artículu 114 que vieno a establecer la obligación de la Conseyería d’Agricultura d’ellaborar una ordenanza de pastos col calter de conteníu mínimu obligatoriu pa los conceyos que procedan a regular los pastos de la so competencia.

N’aplicación d’esta previsión llegal, el Principáu d’Asturies ellaboró una ordenanza-tipu reguladora de los pastos titularidá de la Comunidá Autónoma na que se regulen los muérganos de dirección y xestión del aprovechamientu de pastos y se prevé la creación de xuntes ganaderes, regulando la so composición.

Cada xunta ganadera noma un pastor que s’encarga del curiáu y vixilancia del ganao de tolos vecinos na época en que los reses permanecen nos pastos comunales.

Pa ser escoyíu ha axuntar los requisitos siguientes: exercer l’actividá agraria a títulu principal, ser vecín del llugar y poseer una cabaña nel monte.

La Conseyería d’Agricultura, anguaño, concede ayudes a la figura del pastor (Reglamentu CEE 2078/1992) pa fomentar métodos de producción agraria compatibles coles esixencies de la protección del mediambiente y la conservación del espaciu natural. El pastor nun ta vinculáu a la xunta por un contratu llaboral, sinón que percibe la so remuneración en forma de sobrepreciu na cuota que-y correspuende llevar de l’Alministración, como subvención a los sos reses propios.

PESCA

Constituía, y tovía constitúi, una fonte productiva importante de la economía asturiano, asina como’l mediu principal de l’alimentación cotidiana de les poblaciones litorales.

Lo que caracterizaba a les rellaciones ente los homes de la mar yera una gran esmolecer pol socorru mutuu, hasta’l puntu de que llegó a establecese una previsión social incipiente qu’atendía a la protección y asistencia d’enfermos, vilde, güérfanos y a la seguridá colectiva na mar.

Les dos figures xurídiques de mayor relieve presentes na pesca yeren la compaña y el quiñón.

La compaña yera’l nome qu’arrecibía’l grupu de pescadores que trabayaben nuna lancha y que constituyía col patrón una compaña o sociedá. Nella los marineros nun yeren meros asalariaos, sinón socios del propietariu del barcu interesaos na empresa, y esti yera un tripulante más que, como patrón, dirixía la compañía.

El quiñón yera la unidá de repartu y taba constituíu pola quinta parte o porción de la pesca obtenida pola lancha. Esta unidá de repartu correspondía a un pescador adultu; si yera deprendiz o grumete arrecibía mediu quiñón. El patrón llevaba dos y a veces tres. La lancha y los apareyos teníen atribuyíos, tamién, los sos quiñones p’amortización y reparación.

PESOS Y MIDÍES

N’Asturies siempre esistieron pesos y midíes peculiares. Ente los pesos vaga citar ente los más usuales los siguientes: el quintal, que tien la equivalencia de cien llibres; l’arroba, equivalente a veinticinco llibres; l’arrelde, equivalente a cuatro llibres; y la llibra, equivalente a cuatrocientos sesenta gramos.

De les midíes citamos les más usuales: el copín, midida de capacidá p’áridos, con una equivalencia que variaba según la zona;asina, en Castripol yera de 8,5 llitros y n’Uviéu y Llanes de 9,5 llitros. La maquila ye una unidá de midida de capacidá que s’utilizaba como cobru n’especie nos molinos. El so equivalente oscilaba ente un llitru n’Uviéu y tres en Llanes. El di de gües, midida típica de superficie del campu asturianu y que ye la estensión de tarrén que se supón qu’una pareya de gües puede trabayar, o arar, nún día; el so equivalente taba fixáu por Real Orden en 1800 vares cuadraes. La fanega, que constituyía tanto midida de superficie como de capacidá; la so equivalencia oscilaba de 74 a 76 llitros. L’arroba, midida de capacidá, usábase pal vino, la sidra y l’aceite y la so equivalencia yera aprosimadamente igual a la cántara. La cántara, midida pa líquidos en xeneral y especialmente pal vino, tenía distintes equivalencies. La media yera de 18, 41 llitros.

En cuantes a pesos y midíes n’Asturies, Prieto Bances destacaba la curiosa coincidencia de que el fechu de que la casa popular española n’Asturies tuviera un frente de seis metros un yera una midida resultáu de la casualidá; esta yera precisamente la midida de la viga media del monte asturianu.

PÍA

Conozse col nome de pía el drechu consuetudinariu que se tien a la recoyida y aprovechamientu de los frutos cayíos de mou natural del árbol ayenu, siempre que tean en tarrén d’aprovechamientu común.

Esti drechu nun protexe l’apropiación de frutos que, anque cayíos espontaniamente, lo faen dientro de propiedaes privaes, nin tampoco el de los dimíos del árbol masque caigan en terrén comunal.

El términu «pía» recibe otres denominaciónes según la zona. Na zona occidental denomínenlu «soutelo», y ta referíu a la cueya de castañes que caen espontaniamente de los oricios que maurecen primero. Llámase en Ribeseya «gandaya» o «gueta», y en Piloña «bolenga» o «bugayu».

Mentes la pía, belonga, soutelo, gandaya, gueta y bugayu se refieren sólo a los frutos d’árboles, contamos cola variedá del «rebuscu», que comprende non sólo los frutos de los árboles, sinón tamién los de les plantes de colleches.

Esta institución de drechu consuetudinariu ta fundada nel principiu de solidaridá vecinal que s’estableció pa qu’asina se beneficiara eficazmente a los llugareños más humildes.

PORCÓN

Una de les xeres de mayor relieve que ta perfaciendo la Comisión de Derechu Consuetudinariu Asturianu ye, precisamente, la que tien como envís recopilar los «porcones» con proyección asturiana esistentes tanto nos archivos de la Comunidá Autónoma como na Biblioteca Nacional d’España, la Biblioteca del Palacio Real, la Real Chancillería y l’Archivu de Simancas de Valladolid.

¿Qué son los porcones?. Reciben el nome de porcones ciertu tipu d’impresos espublizaos nos sieglos XVI a XIX que conteníen les alegaciones xurídiques redactaes polos abogaos a fin d’informar y instruyir a los xueces del drechu de la so parte, alegando lleis y razonamientos en defensa de la so causa, y impugnando les del alversariu. La so denominación vulgar deriva del estilu tipográficu nel que yeren impreses les portaes de los mesmos, que solíen tar por una orla y enmarcaes debaxo por una estampina relixosa, una cruz o una invocación llatina y nos que destacaba la palabra POR con caracteres gruesos y en mayúscules, pa continuar na llinia siguiente col nome del alegante, en lletra yá normal. A la ringlera siguida volvíase a destacar centrada, la voz CON, pa siguir na otra llinia con caracteres más pequeños, col nome o nomes de los demás litigantes. D’ende que pola unión d’estes dos preposiciones tan sobresalientes, POR-CON, esti tipu d’impresos recibiera nome tal nel argó bibliográficu. Salvando les distancies, el so papel y conteníu yera equivalente a la portada de los actuales sumarios xudiciales nos que aparez destacáu’l nome del demandante y el del demandáu.

Por estensión, dase tamién el nome de porcones a tolos impresos d’esta triba, anque portada, tipografía y redacción tuviera daqué variante, siempre que contuvieran non sólo les alegaciones, sinon el dar conocencia pa información pública del resultáu del pleitu.