Ignacio Arias Díaz
Lletráu de la Xunta Xeneral del Principáu d'Asturies
Les Noticies, 15-10-00. Pp. 18
Atrás PDF
PRINDA DE GANAO: los reses perdíos
Prindar ye retener los ganaos qu’invadieron finques ayenes.
Ye una figura de gran raigañu n’Asturies de la que podemos alcontrar antecedentes en documentos de 1624 y 1814, alusivos a la delimitación de los territorios de los conceyos d’Onís y Cangues d’Onís, nos que se nos fala de normes reguladores de pastos y ganao rellatives al «usu y aprovechamientu en pacer y dormir», «prindada de los ganaos qu’entren a pala y pastor», «puertos altos y baxos», «límite de pastos y limitaciones pa ciertos tipos de ganaos».
La costume de prindar ganao pasó a xustificase mediante la so incorporación a distintes disposiciones remanecíes del Principáu d’Asturies. Pasó de ser fonte secundaria del ordenamientu xurídicu que requier ser alegada y probada en xuiciu pa la so aplicación, a fonte primaria.
Asina, l’artículu 118 de la Llei del Principáu 4/1989, de 21 de xunetu, d’ordenación agraria y desarrollu rural, apodera a los ayuntamientos y al personal de la Conseyería d’Agricultura pa prindar el ganao que s’alcuentre en pastos de cualquier naturaleza y titularidá, nos que’l dueñu nun seya conocíu, y a depositalos en llugar idoniu. La referida aprehensión será fecha pública mediante anuncia nel ayuntamientu respectivu, nel Boletín Oficial del Principáu y nun diariu rexonal, pudiendo facese cargu del mesmu’l qu’acredite ser el so propietariu nel plazu de venti díes.
Pal supuestu de que trescurra dichu plazu ensin que naide lo reclame, y siempre que’l ganao cumpla coles condiciones sanitaries adecuaes, procederáse a la so enayenación mediante subasta pública ente ganaderos del llugar. L’ayuntamientu será’l que perciba’l beneficiu que s’obtenga de la subasta y la so cuantía destinaráse a financiar obres y servicios municipales, revirtiendo a la Conseyería d’Agricultura l’importe de los gastos ocasionaos pola retirada y manutención del ganao.
Pal supuestu de que’l ganao nun cumpla coles condiciones sanitaries debíes y fora imposible’l so saneamientu, inda adoptaes toles midides necesaries, procederáse al so sacrificiu inmediatu. Si d’esti sacrificiu se deriva dalgún beneficiu económicu, revertirá, en primer llugar, a la Conseyería d’Agricultura pa sufragar los gastos ocasionaos a la mesma, y l’escesu, si lu hubiera, al ayuntamientu.
Esta prevención llegal tuvo la so tresllación a les Ordenances Municipales reguladores del usu y esfrute de montes y pastos, pudiendo citase como puntu de referencia l’aprobada pola Parroquia Rural de Saliencia de 11 de mayu de 1990, que dedica’l so artículu 10 a la prenda de ganao, y que trescribimos lliteralmente pola espresividá que s’obtién de la so llectura:
«a) Siguiendo l’enraigonada costume del llugar y pa evitar l’usu y esfrute de los pastos y aprovechamientu por parte de les persones non empadronaes na Parroquia, con residencia mínima de seis meses al añu y alta nel réxime especial agrariu de la Seguridá Social, o que reuniendo estes condiciones nun paguen la tasa d'’provechamientu establecida, la Xunta de la Parroquia queda espresamente facultada pa ordenar a ún o varios vecinos de la Parroquia que, cola presencia del guarda forestal o funcionariu análogu de la Conseyería d'’gricultura y Pescal, procedan a retener (prindar), recoyer y empobinar a llugar seguru que la Xunta señale, tol ganao y reses que, en tales condiciones, faigan usus de los montes propiedá de la Parroquia.
Nel llugar señaláu pola Xunta, tales reses serán rigurosamente rexistraes pol veterinariu municipal.
El Presidente de la Xunta, o quien legalmente lu sustituya, requerirá polos medios qu’estime procedentes al propietariu o propietarios de los reses reteníos, si foren conocíos.
Si nun lo foran, pondrálo en conocimientu de la Guardia Civil, indicando les circunstancies identificatives de les reses reteníes.
b) Identificáu y personáu l’infractor, esixiráse-y l’abonu de los daños y perxuicios causaos, en conceptu de frutos o pastos consumíos, gastos de tresporte, alimentación del ganao na retención y honorarios del veterinariu pol reconocimientu de los ganaos tantu nel momentu de la retención como nel de la so entrega al propietariu.
Estos daños, perxuicios y gastos, serán fixaos, prudencialmente, pola Xunta de la Parroquia.
c) Con independencia de los daños, perxuicios y gastos del apartáu anterior, l’infractor o infractores vendrán obligaos a pagar una multa de 500 pesetes por cada cabeza de ganáu.
Será condición indispensable pa poder retirar el ganao retenío que se faigan efectivos los daños, perxuicios y gastos, asina como la multa impuesta.
La Xunta de la Parroquia, podrá facer efectivos l’importe de los daños, perxuicios y gastos y la multa, pela vía d’apremiu».
La prinda de ganao, aparte de la so regulación llegal, dase na vida ordinaria d’Asturies, bastando pa contrastar esta circunstancia la llectura de los diarios rexonales. Son famosos pola so difusión nos medios de comunicación los pleitos que sistemáticamente caltienen los ayuntamientos de Quirós, Morcín, Riosa y L.lena, que s’acusen mutuamente d’articular campañes de prindaxes na sierra del Aramu y d’interpretar de forma peculiar los alcuerdos establecíos sobre los aprovechamientos de pastizales.
RIXIDOR DE PASTOS: el coordinador de los pastores
Namás nos consta la so esistencia como muérganu con característiques propies, na montaña de Cuadonga. La so regulación ta contenida na Ordenanza pal aprovechamientu y meyora de los pastos comunales de la Montaña de Cuadonga aprobada pol Plenu del ayuntamientu de Cangues d’Onís en sesiones plenaries de 19 d’avientu de 1991 y 7 de mayu de 1992.
El Rixidor de Pastos constitúi, xuntamente col Conceyu de Pastores y la Xunta de Pastos, los muérganos de dirección y xestión pal aprovechamientu de los pastos comunales de la Montaña de Cuadonga.
Cadún d’estos muérganos tien competencies propies.
Asina, al Conceyu de Pastores correspuénde-y asesorar al ayuntamientu de tolo rellativo a los aprovechamientos, proponer el réxime de la siguiente campaña ganadera y señalar les prestaciones y meyores que foren necesaries.
La Xunta de Pastores decide les compensaciones, aprovechamientos y meyores de los pastos y vela pol cumplimientu de la Ordenanza, resolviendo los problemes y incidencies que pueda plantear la observancia de los preceptos conteníos na mesma.
El Rixidor de Pastos preside el Conceyu de Pastores y tien como función treslladar al ayuntamientu les sos iniciatives y deseos y coordinar el llabor de los celadores escoyíos por cadún de los doce distritos qu’integren les dos zones, alta y baxa, en que se dixebren los pastos.
El Rixidor de Pastos tien a les sos inmediates órdenes a los Guardes de Pastos.
El Rixidor de Pastos escuéyenlu’l día 25 de xunetu de cada añu, en sesión conxunta que cellebren l’ayuntamientu de Cangues d’Onís y el Conceyu de Pastores na Montaña de Cuadonga.
El procedimientu d’elección ye ésti: 1) Podrán votar namás los celadores. 2) Serán candidatos tolos celadores. 3) La votación va ser secreta y resultará escoyíu’l Celador qu’algame mayor númberu de votos. Casu d’empate resultará nomáu’l de mayor edá. 4) Los Celadores y el propiu Rixidor recibirán nesta sesión les credenciales acreditatives de los sos cargos.
El Rixidor dirime con votu de calidá los empates que puedan producise nes sesiones cellebraes pol Conceyu de Pastores, que se dirimen por mayoría de votos.
Igualmente, el Rixidor de Pastos tien la obligación de treslladar al ayuntamientu los alcuerdos adoptaos pol citáu Conceyu de Pastores p’adoptar les midides que se deriven de los mesmos y que resulten pertinentes.