Ignacio Arias Díaz
Lletráu de la Xunta Xeneral del Principáu d'Asturies
Les Noticies, 03-12-00. Pp. 6

Atrás     PDF

LA SESTAFERIA: el compromisu social

La sestaferia ye la carga vecinal que recae nos vecinos pa la conservación y reparación de los caminos públicos. Esta denominación vien de la forma medieval de llamar al vienres, yá que nesti día se celebraba esta institución, que tuvo y tien, anque parcialmente, un gran arraigu n’Asturies.

Yá les Ordenances Xenerales del Principáu d’Asturies de 1781 dediquen una atención especial a la regulación de les sestaferies, estableciendo ente otres puntualizaciones les que vienen siguío: teníen qu’empezar nel mes de marzu y acabar a principios de payares, fecha a partir de la que los rigores climáticos les facíen más penoses; cada vecín tenía qu’emplear mediu útil cada selmana, sancionándose la non concurrencia; la dirección de los trabayos de sestaferia encomendábase al director de los caminos del conceyu; nadie, nun siendo los cures, taba esento de concurrir, bien en persona o bien porque mandaren un criáu o xornaleru en representación.

L’interés y la necesidá de la sestaferia continuó y determinó que nel añu 1839, la Diputación provincial d’Uviéu aprobara’l Reglamentu de Sestaferies pa la construcción, igua y caltenencia de los caminos y pontes. No que podíemos llamar «exposición de motivos» d’esti reglamentu hai una definición clara y precisa de la sestaferia: «Carga vecinal pa la caltenencia y igua de los caminos públicos que tien apoyu non solo na aquiescencia unánime de los pueblos, sinón tamién na costume inmemorial, los alcuerdos de l’antigua Xunta y Diputación del Principáu y les Reales Provisiones del suprimíu Conseyu de Castiella». El reglamentu consta de siete títulos. El Títulu I ta dedicáu a la policía xeneral de los caminos públicos, de los qu’estrema tres clases: los xenerales qu’envereden a la capital de cada conceyu; los que ponen en comunicación los conceyos ente sigo; y los del serviciu parroquial de cadún d’ellos dientro de les sos respectives llendes. Nesti Títulu prohíbese depositar nos caminos públicos cualquier tipu de material que los estropie o los erme. De la mesma manera establezse la obligación de los dueños de les estayes contigües a los caminos públicos de cuidar y cortar los artos y sebes que formen los cierros, de tala miente que dexen el tránsitu expeditu y nun molesten al que pasa.

El Títulu II ocúpase d’especificar les persones que tienen qu’acudir a les sestaferies, y entama cola declaración xeneral de que «se confirmen y autoricen otra vuelta por esti Reglamentu les sestaferies, esto ye, les reuniones periódiques y vecinales de costume inmemorial y nunca interrumpida hasta’l día, pa iguar los caminos públicos, caltenelos en bon estáu y construir otra vez los que la comeniencia pública reclame». Depués establez la obligación xeneral d’acudir de tolos vecinos, nun siendo los notoriamente torgaos o enfermos, los menores de quince años, los que pasen de 66, asina como los individuos del Ayuntamientu, los alcaldes, racaldadores de contribuciones y aquellos que por lleis y reales ódenes vixentes tuvieran relevaos d’esti serviciu. De cada casa va dir namás una persona a la sestaferia, y puede poner un sustitutu o esimise pagando. La sestaferia faise namás un día a la selmana, y nun dura menos de siete hores, empleando por fuerza seis nel trabayu. Siguío establez otra serie d’obligaciones asina como les sanciones que s’imponen a los que nun cumplen.

El Títulu III regula la figura de los encargaos d’organizar y dirixir les sestaferies, función qu’atribúi a los Conceyos, cuando através de los cuerpos municipales cuando através d’ausiliares, qu’en tou casu se van entender dependientes de los Conceyos y invistíos de la suficiente independencia y autoridá pa que sían respetaes y obedecíes les disposiciones qu’adopten en cumplimientu de los deberes.

El Títulu IV ocúpase de la figura del Inspector Xeneral. Al Inspector Xeneral de Caminos nómalu la Escelentísima Diputación Provincial ente los propios individuos, y l’exerciciu de cargu yera enteramente gratuitu y voluntariu. Les funciones del Inspector Xeneral yeren les de dar unidá y coherencia a los trabayos entamaos nos distintos distritos del Principáu pa construir, iguar y caltener pontes y caminos.

La xera d’uniformar en tolos distritos les sestaferies y, a la vez, ilustrar coles sos lluces a los encargaos de dirixiles, llabor nel que se podía reclamar l’aidanza del arquitectu del Principáu, yeren les más sobresalientes funciones. Tamién autorizaba les llibrances de los fondos provinciales concedíos a los Conceyos.

El Títulu V ta dedicáu a la figura de los Subinspectores de Distritu, de necesaria esistencia nos conceyos que nun escedieran de dos llegües cuadraes. Los conceyos qu’escedan n’estensión de tres llegües cuadraes disponen de dos inspectores que proponen pal cargu de subinspector y por dos vecinos intelixentes y celosos del bien públicu escoyíos ente los mayores contribuyentes pol Ayuntamientu. El cargu d’individuu de la Comisión tenía calter gratuitu y voluntariu y yera irrenunciable.

Ún de los cometíos más importantes d’esta Comisión yera’l d’averiguar los carros, xugaes de gües y instrumentos de trabayu de sestaferies qu’hubiera en cada parroquia, formando una suerte d’inventariu de toos estos útiles, con espresión de los suxetos que los posean. L’Ayuntamientu apurre la ferramienta necesario (fesories, pales, piques) pa la construcción de caminos, encargándose tamién de la custodia d’ello.

Por último, el Títulu VI ocúpase de regular la figura de los vistores de parroquia. Esiste un vistor o más en cada parroquia sigún estensión y población, y el nomamientu correspuende al Conceyu. Cuando una parroquia nun pase de 50 vecinos tendrá un vistor, dos si pasara d’esti númberu, y tres en superando los 200 vecinos. La obligación del vistor yera cumplir les órdenes relatives a sestaferia y construcción de caminos que-y comunicara l’Ayuntamientu, dando parte de toes aquelles anomalíes qu’apreciara nos caminos.

La función yera la de convocar les sestaferies, siempre con 24 hores d’anticipación, designando los sitios onde teníen abiertu’l tayu los trabayadores y entremediando la ferramienta necesario pa desenvolver el llabor.

La sestaferia ye una institución que caltién plenamente la vixencia en dalgunos llugares. Basta con atender a les noticies que se publiquen nos diarios de comunicación asturianos pa verificar esta actualidá. Tuña, pueblu exemplar d’Asturies del añu 2000, desenvolvió los trabayos d’acuriosamientu y reparación de víes y caminos através de la sestaferia; vecinos de La Braña de la Rondiella en Cuideiru lleven nueve años construyendo la ilesia, y fainlo através de la institución de la sestaferia.

Amás, numberoses Ordenances d’Ayuntamientos siguen manteniendo la obligatoriedá de la sestaferia, regulándola con determinaciones asemeyaes, anque atemperaes nel tiempu, a les de la Diputación Provincial d’Uviéu de 1839. Valga a títulu d’exemplu la ordenanza númberu 2 de les aprobaes el 11 de mayu de 1990 pola parroquia rural de Saliencia (Somiedu), relativa a la prestación personal, como recursu de carácter estraordinariu pa la realización d’actividaes de la competencia d’esta parroquia rural. Los oxetivos a que se puede destinar esti recursu son coincidentes colos que determinaron la regulación de la sestaferia hai dos sieglos: l’apertura, reconstrucción, caltenimientu, reparación y llimpieza de caminos y víes públiques urbanes y rurales; la construcción, caltenimientu y reparación de fontes y preselbes; y la conservación, caltenimientu y reparación de cualquier otru bien d’usu y de serviciu públicu d’interés esclusivu de la parroquia.

Mantiénense les multes por incumplimientu d’esti deber que se fixen nel doble del salariu mínimu interprofesional vixente.