Ignacio Arias Díaz
Lletráu de la Xunta Xeneral del Principáu d'Asturies
Les Noticies, 17-12-00. Pp. 9

Atrás     PDF

LA SOCIEDÁ FAMILIAR ASTURIANA

La sociedá familiar asturiana ye la constituida al estilu del país, a perdes y a ganancies, ente los miembros d’un futuru y conveníu matrimoniu d’agricultores y los padres d’ún d’ellos, pa establecese en comunidá de vida y d’esplotación agrícola y pecuaria, con aportación de capital y de trabayu, cola fin de velar pola conservación de la unidá patrimonial, del so aprovechamientu en común y pa contribución y repartu de les cargues familiares y ausiliu y ayuda mutuos.

Tamién suel espresase esta institución coles frases de «a mesa y mantel», «a pan y cuchiellu», «a un mesmu fueu».

La so estructura xurídica, siguiendo la monografía de Modesto Blanco García, podía resumise nel siguiente esquema:

Forma. Formalízase n’escritura pública de capitulaciones matrimoniales, anque en dalgunos casos instrumentábase en documentu priváu. Al otorgamientu concurríen los futuros contrayentes y los sos padres.

Medios. Los medios que se recoyíen pa dar soporte a la sociedá yeren, normalmente, la meyora del terciu al fíu o fía contrayente «pa la casa», y la dote o capital privativu al otru, consistente nuna cantidá en metálico que recibía el padre meyorante pal so depósitu y alministración, con obligación de devolvela cuando llegalmente procediera. A ella había qu’añedir, como complementu verificáu yá en disposición testamentaria, la ratificación de la meyora fecha en capitulaciones y, nel so casu, l’asignación íntegra de toles podencies, cola obligación de pagar en metálico la lexítima a los demás heriedes.

Elementos personales. El matrimoniu, o namás ún de los cónyuxes, que ye vilbu, y los futuros esposos, que tán obligaos a cuidalos hasta la so muerte y a face-ys les honres fúnebres.

Elementos reales. Tán integraos pola casería, na acepción que yá vimos cuando tratemos esta figura.

Elementu espiritual. Ta integrao pol afectu familiar o cuasi familiar que xunta a los socios pola so vinculación a la casa.

Finalidá. La principal ye la conservación y acrecentamientu del patrimoniu familiar, de la casería en suma, procurando que col so aprovechamientu y producción s’atiendan les necesidaes comunes.

Ye costume que’l primoxénitu escoyíu pol padre reciba’l nome de petruciu o mayorazu, y qu’a la casa matriz se la llame casa petrucial.

SUBASTA

El términu subasta vien de la espresión llatina subhasta, y deriva de la costume romana de fixarcon una llanza o pica el llugar onde diba desenvolvese la venta pública.

N’Asturies, dexando a un llau les yá famoses subastes realizaes na Casa de les Ballenes de Xixón, la de Cotu de Sobrescobiu y la de Millón y Alcaba de Grau, siguen teniendo gran raigañu les subastes públiques al ramu procesional («la puya’l ramu») y al derechu y honor de conducir na procesión a una determinada imaxe.

TESTAMENTU MANCOMUNÁU

Ye’l que se fai de común alcuerdu («d’acordies»), disimuláu baxo la forma de dos testamentos independientes que se formalicen por separao pa evitar la prohibición llegal, pero con numberación correlativa y col mesmu conteníu, y otorgándose’l mesmu día anque non n’unidá d’actu, de tal manera que l’home y la muyer institúyense herederos recíprocamente o en beneficiu de terceros.

Esta forma de materializase’l testamentu mancomunáu tien por oxetu evitar la prohibición contenida nel artículu 69 del Códigu Civil en base al cual «Nun van a poder testar dos o más persones mancomunadamente, o nún mesmu instrumentu, yá lo faigan en provechu recíprocu, yá en beneficiu d’un terceru».

La Llei sobre l’estatutu de la esplotación agraria y de los agricultores del 24 d’avientu de 1981 permitió’l testamentu mancomunáu a fin d’ordenar la sucesión na esplotación familiar agraria na so integridá, lo que n’últimu términu vieno a suponer dar visos de llegalidá a una práctica consuetudinaria enraigonada nel campu asturianu.

VECERA

Ye una institución en virtú de la cual les manaes de ganáu de distintes clases qu’aprovechen pastos comunales, siempre al cuidáu de los vecinos mediante turnu establecíu al efectu ente toos ellos.

A estes menaes del conceyu dáse-ysel nome de veceres.

El so orixe ye mui antiguu y el serviciu que s’emprestaba al traviés de la vecera rixíase pola costume.

El mayor arraigu dábase naquellos conceyos nos que’l vecindariu nun yera mui numberosu y nun se podía pagar un pastor asalariáu, sinón que los vecinos turnábense, siguiendo el sistema de vecera, pa llendar los rebaños de la xente del pueblu.

Nel conceyu de Ponga veníase entendiendo que l’acepción de la palabra vecera procedía de vez, y «consiste nel cuidáu de les oveyes de tolos vecinos, guardando ciertos turnos correlativos».

Nesti conceyu repicábase la campana de la ilesia hacia les ocho de la mañana, momentu nel que se soltaben les oveyes de cada casa, siendo conducíes polos vecinos hasta un sitiu previamente señaláu onde se reuníen toes y se facía cargu d’elles el pastor al que-y correspondía la breda.

Les veceres estremábense, y non sigún les diferentes especies de ganáu namás, sinón tamién el tiempu que tuvieran.

Les veceres de ganao menor (llanar y caprín) yeren de dos clases: vecera grande, a la que diben los reses adultos, y la vecera chica, na que se integraben los corderos y cabritos. El ganao vacuno de cría formaba vecera aparte y yera’l que menos cuidaos pidía: llevábense al monte y dexábense en cuasi completa llibertá.

La voz vecera nun s’utiliza namás pal cuidáu de les manaes del conceyu, sinón que tá unida a toa aquella actividá suxeta a breda.

Asina, pal serviciu del molín farineru per hores, mediu día o completu, o sía «vez o tiempu pa disponer del molín».

En Somiedu sigue teniendo vixencia esta acepción del términu vecera.

Nel momentu actual tien vixencia en mui contaes aldees.

VÍSTORES

El vístor ye la persona qu’ostenta la representación de los habitantes d’un pequeñu nucliu de población, y actúa a mou de delegáu de la primer autoridá municipal del conceyu.

Tamién lu conocen como pedaniu, celador, velanderu o monteru.

Nun exerce autoridá como tal, sinón que les sos funciones son les de cumplir les órdenes del Ayuntamientu, tresmitir los bandos municipales, asina como les notificaciones y convocatories y orfecer información a los vecinos, organizando la sestaferia y los toques de campana repicada pa convocar a tal efectu, o nel so casu, diendo de casa en casa tocando’l turullu.

El cargu, normalmente ye de rotación anual, de mou que cada vecín desempeña por turnu les funciones propies del mesmu.

Los atributos del vístor son el turullu o cuernu pa llamar a xunta o tamién una vara que simboliza’l cargu.

VILDEDÁ UNIVERSAL

Ye una figura mui enraigonada nel occidente asturianu y que tien por finalidá emprestar continuidá a la familia. Ta orixinada na cláusula testamentaria d’usufructu universal a favor del cónyuxe sobreviviente, qu’afecta a los bienes muebles y a los inmuebles.

Esta costume evita la disolución de la familia por muerte d’un cónyuxe y mantién al supérstite nel mesmu rangu económicu.

Con too y con eso, tien que tenese en cuenta que nel Derechu Común conteníu nel Códigu Civil nun s’almite la posibilidá d’usufructu universál, yá que l’artículu 813 del Códigu Civil prohíbe cualquier clas de gravame sobre la llexítima, y nel usufructu universal, ésta queda afectada.

Nostante ye una institución viva nel occidente d’Asturies y ta consentida polos heriedes que la respeten hasta’l fallecimientu del cónyuxe supérstite.

Con esti artículu doi por rematada la mio collaboración con LES NOTICIES, a los qu’agradezo l’ofrecimientu realizáu que, creo, permitió, al menos, tomar conocimientu de la xera que dende’l Parlamentu Asturianu ta desplegando la Comisión de Derechu Consuetudinariu Asturianu.