Ignacio Arias Díaz
Lletráu de la Xunta Xeneral del Principáu d'Asturies
Les Noticies, 18-06-00. Pp. 17
Atrás PDF
L’ANTOXANA: el patio de mio casa ye particular.
L’antoxana (del llatín ante ostiana, énte la puerta) ya la pequeña zona de tarrén lisu y llanu asitiada inmediatamente delantre de la puerta y de la corte de la casa campesina.
La so finalidá ye la de facilitar la realización de los llabores propios de la vida campesina: poner los frutos a secar, cortar y depositar lleña, preparar el carru, xuncir el ganáu, asina como dar pasu a les distintes dependencies y anexos de la casería.
Ye opinión xeneralizada que namás puede recibir el nome d’antoxana’l tarrén que ta énte la casa, y eso si nun tien cerca. Con cerca llámase corralada, y si ye pequeña, corrada. Tamién muriáu. Si s’estiende a los llaos y detrás de la casa, recibe el nome de rodeos o arrodeos.
L’auténtica antoxana ye la que conserva’l so calter particular, la privada, yá que si forma una verdadera plaza tendrá’l calter de pública. Mentes l’antoxana cumple los sos esenciales cometíos rurales como pertenencia de la casa, col efectu xurídicu fundamental de siguir la so suerte, nun plantea nengún problema en drechu. La so propiedá pertenez al dueñu de la casa. Los problemes surden cuando por sucesión o venta a persones distintes se fragmenta, divídese la casa, pasando a constituyir dos o más propiedaes independientes con salida a l’antoxana orixinaria.
La xurisprudencia de los tribunales asturianos vieno ocupándose ensin solución de continuidá de los problemes xurídicos que plantea l’antoxana, non solo cuando la casa matriz ye oxetu de división, sinón el propiu usu de l’antoxana, atemperando les sos resoluciones a la propia evolución d’esta institución.
Ello evidencia la so vixencia, asina como los contornos de la so realidá actual.
Asina, consideróse un usu normal de l’antoxana’l tránsitu de tractores o automóviles, frutu del dinamismu operáu nel usu de la maquinaria agrícola, asina como de la mecanización. Al contrariu, considérase un usu anormal el depósitu de cuchu y escombros pola molestia y insalubridá que supón n’actualidá tener a la vista tales materiales.
L’ARRENDAMIENTU Y LES SOS VARIEDAES.
El contratu d’arrendamientu surde nel campu asturianu simultániamente a la decadencia del foru. El pagu de la renta taba determináu pola costume o por escrito y podía ser en perres o en frutu.
La estabilidá del arrendatariu asturianu provenía de que, por aplicación de la costume local, taba protexíu contra’l desahuciu inxustificáu si la tierra taba bien cultivada y nun tenía atrasos nes rentes.
Venía almitiendo diverses variedaes.
L’arrendamientu d’herba: Almite, al empar, dos modalidaes, la venta d’un determináu númberu de carros d’herba que’l comprador estrai de la finca, seca y almacena pela so cuenta; o la venta de la producción del prau, tanto de la herba como de la denominada pación, esto ye, el pastu, col consiguiente derechu de entrada del ganáu na finca pa pacer nel añu agrícola.
L’arrendamientu «a corre para»: Traduzse nel cambiu d’estayes que cada determinaos años facíen ente sí dos o más llevadores d’un mesmu arrendador, col oxetu de rotar los cultivos pa obtener una meyor productividá.
La propiedá a «monte y villa»: Comprende tanto los tarrenos incultos como los cultivaos. Taba integrada polos elementos que vienen darréu: términos bravos, términos vareables y propiedá absolutamente individualizada.
La llexislación d’arrendamientos rústicos fai continua referencia a los usos y vezos locales.
Ye ésta una materia de gran importancia nel caltenimientu de les estructures rurales asturianes que tien que ser oxetu d’una especial atención pol llexislador.
EL BISTECHU O PINGU.
Esta institución traduzla la palabra «alero» y por estensión ye l’espaciu de tarrén que cubre’l bistechu. Xurídicamente tien l’algame de delimitar la propiedá y constitúi una presunción «iuris tantum», de manera que, en tantu nun haiga prueba de lo contrario, el tarrén énte la peré del edificiu y la llínia de caída del agua pluvial pertenecerá al dueñu del edificiu, seya casa, horru o payar.
Recibe diversos nomes sigún la zona d’Asturies de que se trate, siendo’l más conocíu, amás de bistechu, el de pingos, na zona de Pravia y Salas. Como tuvo ocasión de recoyer Rodríguez Castellano na so obra «Contribución al vocabulariu del bable occidental», "de las mias pringueras pa dientro todo yía miou".
LES CALENDES.
Entiéndese por calendes l’aprovechamientu por turnu de l’agua pal riegu de les finques. Los turnos de riegu fíxenlos los vecinos de mutuu alcuerdu y tienen que respetase rigurosamente.
Tiénense noticies de que nel pueblu de Llaniu (Salas) celébrase una subasta añal pal riegu de la "veiga", cola agua del ríu Narcea, elevándose el nivel d’agua colos "banzaos" que se fai travesando vigues nel ríu y amontonando piedres.
Serán los trabayos de campu que desenvuelva la Comisión de Drechu Consuetudinariu Asturianu de la Xunta Xeneral los que delimiten l’algame d’esta costume, asina como la so implantación xeográfica.
LA CASERÍA.
Ye ensin delda una de les más destacaes instituciones tradicionales asturianes y actúa como nucliu alredl del cualu s’agrupa la familia rural asturiana.
Ye, xunto a la parroquia, la institución alredol de la que se vieno moldeando la estructura organizativa del campu asturianu.
Puede definise como una unidá autónoma de residencia, producción y consumu, comprendiendo la tierra qu’una familia puede trabayar y que, al empar, puede caltenela. La casería ta integrada por un elementu material y un elementu personal.
L’elementu material ye un conxuntu de casa-habitación cola so antoxana, corte, horru o panera, güertu de llegumes al abrigu de les cases, tierres de cebera nos valles, praos de pastu nes lladeres, monte altu y baxu, ganáu y instrumentos y aperos agrícoles.
L’elementu personal, humanu, ye la familia que la ocupa, el matrimoniu de los padres y el contraíu pol fíu «casáu en casa», que ye’l que continúa viviendo nella, y/o el fíu «casáu pa la casa», que viviendo notra treslládase a ella, viviendo xuntos tolos matrimonios.
El profesor Prieto Bances, que quiciabes tenga escritu’l meyor tratáu sobre la casería, califica esta institución como una unidá orgánica d’esplotación agropecuaria capaz de sostener a una familia campesina a la que val de llar y solaz.
Sigún la costume asturiana, la casería heredábala’l fíu o la fía que convivía na casa, pero, sigún Prieto Bances, yera más bien una herencia de xestión que de propiedá, porque la casería ha pertenecer al grupu familiar que vive baxo’l mesmu techu. La facultá del padre pa escoyer ye llibre, anque suelen tenese en cuenta la llaboriosidá del fíu o la bondá del que destaca pol so amor filial.
Nel actual grau de desarrollu económicu d’Asturies, la casería ta nuna grave crisis, tanto como sistema de producción como de base de la convivencia familiar. D’un llau, el desarrollu industrial y d’otru, la escasa productividá de la casería na so estructura primitiva, fain qu’esta institución namás caltenga l’arraigu en zones concretes d’Asturies, y atemperada a la so realidá actual.