Foi ún de los contratos más típicos y frecuentes n’Asturies. Realmente comuña ye’l nome que se da n’Asturies a l’aparcería pecuaria (dir a la parte). Ye un contratu pol que una persona, el comuñeru, recibe d’otra, el propietariu, ganáu en préstamu pa curialo, llindialo y mandase d’ello pal trabayu y aprovechamientu del lleche, mantega, quesu y cuchu.

La comuña almite estes variedaes: «al armún o media ganancia», «a la ganancia», «a la media cría» y «de mediu a mediu».

La comuña «al armún o media ganancia», ye aquella na que’l propietariu entrega’l ganáu yá apreciao pa que lo curien y llindien, dexando al comuñeru esfrutar de los esquilmos del lleche, mantega y quesu, coles condiciones de que cuando llegue el casu de vendelo partirán ente los dos l’escesu de preciu de la venta en rellación a la tasación, y de que si los reses muerren o sufren daños, el d’apechar será’l propietariu, menos qu’hubiera neglixencia nel comuñeru, quedando llibre la cría pa repartir.

La comuña «a la ganancia», yera más onerosa porque’l propietariu recuperaba primeru’l capital enentes de dividir el lucru, de tal manera que si morría o se mancaba dalgún res, la perda suplíase coles críes o col aumentu de valir de los otros reses inicialmente apreciaos; si nun esistiera beneficiu, el comuñeru nada percibía pol trabayu realizáu.

La comuña «a la media cría», consistía en que’l propietariu entregaba al caseru les vaques; los xatos que nacieren repartíense a medies ente los dos, y si les vaques se vendíen el productu de la venta pasaba íntegramente a poder del dueñu y la comuña continuaba a medies nes críes.

Por último, la comuña «de mediu a mediu», consistía en que cadún agotaba la mitá del ganáu y les perdes y ganancies dividense por igual; los curiaos del tenedor compensábense colos esquilmos de lleche, cuchu y trabayu.

Hasta tiempos relativamente recientes pudo constatase la esistencia de llitixos sobre la comuña asturiana de yegües, nes sos distintes variedaes, asina como sobre la so estinción y liquidación.

Del calter sangrín del contratu de comuña féxose ecu’l refraneru asturianu: «De la vaca acomuñada, nin llechi, nin dineru, nin nada»; «De les vaques a comuña, lleva l’amu hasta la uña»; «Con llechi, mantega y quesu caseru, despídete, compañeru»; «El que con vaques comuñeres quiera facer cuartos, nunca verá los sos fíos fartos».

CONCEYU ABIERTU

El réxime de conceyu abiertu ye l’últimu niciu de la democracia pura.

Yeren estos conceyos «a campu abiertu», «a son de campana tañida» o «a toque d’añafil», una asamblea xeneral de vecinos, d’obligatoria asistencia, espresión de la verdadera solidaridá campesina. Exercíen la triple potestá, llexislativa, executiva y xudicial, consistentes la primera na redacción d’Ordenances normatives de la vida parroquial, la segunda na aplicación de les propies Ordenances a los asuntos sometíos al so conocimientu, y la tercera na resolución de los conflictos vecinales y na imposición de les correspondientes sanciones.

Por regla xeneral, el conceyu abiertu componíase namás d’homes, pero podíen asistir les muyeres representando a la casa, a falta del maríu. Cadún de los vecinos tenía derechu a voz y votu. Pero esti derechu de votu yera susceptible de venta, hasta’l puntu de que n’años de males colleches los más probes vendíen la so voz de villa a los ricos facendaos, qu’asina esfrutaben de más poder.

Lo normal yera que’l conceyu s’aconceyara al son de la campana tañida, cuasi siempre los domingos al salir de misa, bien na escuela, bien al aire llibre, a la solombra d’un árbol secular, baxo la presidencia d’un rixidor o procurador que se nomaba’l primer día del añu y al que tocaba cumplir los acuerdos tomaos na xunta.

Tratábase de tolo qu’interesaba a l’aldea, singularmente les cuestiones agraries de la colectividá: repartu de tierres comunales pal cultivu vecinal, andeches, sestaferies, monteríes pa batíes d’animales xabaces, regulación del orde públicu y similares. Asina mesmo tratábense los temes rellativos a la contratación de maestros qu’impartiesen enseñanza nos llugares nos que nun esistía escuela nacional.

Los alcuerdos, adoptaos por mayoría, yeren inapelables, imponiéndose multes a los infractores.

El réxime de conceyu abiertu nun ye, nin muncho menos, un niciu hestóricu a cencielles que pasara a meyor vida. Tolo contrario. La llexislación estatal de réxime local otórga-y un reconocimientu espresu como un réxime especial de funcionamientu p’aquellos municipios de menos de cien habitantes. Asina mesmo, a nivel autonómicu, la Llei del Principáu d’Asturies 11/1986, de 20 de payares, pola que se reconoz la personalidá xurídica de la parroquia rural, prevé nel so artículu 14.2, que «podrá establecese’l réxime de conceyu abiertu p’aquelles entidaes de menos de cien habitantes y que lo soliciten espresamente nel escritu de pitición de reconocimientu de la so personalidá».

CONCENTRACIÓN PARCELARIA.

Ye una figura que tuvo siempre presente nel campu asturianu y que caltién la so vixencia actual.

El so entecedente xurídicu hai que buscalu na Ordenanza Xeneral del Principáu d’Asturies de 1781, qu’establecía que «polo muncho que convién a la agricultura que se tengan les podencies xuníes, y les costoses dimensiones qu’ocasiona la mezcla d’estayes pertenecientes a distintos dueños, ordénase que pueda obligase a cambios, cuando a xuiciu de la Xunta d’Agricultura fora o mui necesario o mui conveniente al que los intente y de poco perxuiciu al suxetu dueñu de la estaya que se solicita cambiar...».

Al momentu actual, la Llei del principáu d’Asturies 4/1989, de 21 de xunetu, d’Ordenación Agraria y Desenvolvimientu Rural, ocúpase de la concentración parcelaria, a la que atribúi como fin «la constitución y caltenimientu d’esplotaciones d’estructura y dimensiones afayadices que permitan el so meyor aprovechamientu n’atención al so destín agrícola, ganaderu o forestal, cualquiera que sía la titularidá del so dominiu, posesión o esfrute».

La filosofía qu’inspira esta figura na so regulación actual xira alredol d’estos criterios: alxudicar a cada propietariu, en cotu redondu o nel menor númberu posible de finques de reemplazu, una superficie equivalente en clas de tierra y valor a lo aportao; alxudicar contigües les finques integraes nuna mesma esplotación, anque pertenezan a distintos propietarios; suprimir les esplotaciones que resulten antieconómiques o aumentar no posible la so superficie, al oxetu de que les esplotaciones agraries constituíes tengan una dimensión igual o superior a la económicamente viable prevista pa la zona y los estayos tengan una superficie superior a la unidá mínima de cultivu; emplazar les nueves finques de manera que pueda ser atendida de la meyor manera la so esplotación dende’l sitiu en que radique la quintana o la finca más importante; y por últimu, dar a les nueves finques accesu directu a les víes de comunicación, pa lo que se modificarán los caminos que faigan falta.

ESFOYACES.

Llámense asina les reuniones de vecinos cellebraes pa esfoyar les panoyes de maíz. Pa ello sentábense en suelu los esfoyadores pa dir quitando les fueyes de la panoya, nun siendo tres o cuatro que dexaben pa enrestrales. Los enrestradores, otra miente, recibíen les panoyes de manes de la moza qu’escoyíen, llamada «apurridora», y enxertábenles na riestra que posteriormente colgaben na solana, corredor y horru.

Terminada la esfoyaza empezaba’l repartu de la «garulla», que yera’l convite que los dueños de la casa daben a tolos que los ayudaron. Parolábase, contábense cuentos y cantábase, ensin que faltara’l baille. La reunión terminaba hacia la 1 de la madrugada, momentu en que los galanes acompañaben a les moces a casa.

Inda pervive, anque non con tola pureza, en munchos pueblos d’Asturies.

Son munchos los versos dedicaos a esti llabor. Destacamos pela so espresividá’l que vien darréu, que recueye la comunicación que surde ente’l mozu y la moza que participen na esfoyaza: