Ignacio Arias Díaz
Lletráu de la Xunta Xeneral del Principáu d'Asturies
Les Noticies, 09-07-00. Pp. 20

Atrás     PDF

FACERÍA: beneficiu pa tola comunidá

Ye l’aprovechamientu común y recíprocu, especialmente de pastos, ente pueblos limítrofes. El ganáu llevábase «a palu en cuellu» o «a rexa vuelta», espresiones que significaben que teníen que sacalo de los términos ayenos el mesmu día, ensin que-yos tuviese permitío dormur ellí. «A palu en cuellu», comprendía el drechu a afalar el ganáu hasta les llendes de la so propia demarcación, dexándolu en completa llibertá; «a rexa vuelta», cuando, colocáu’l ganáu en la llinia divisoria, amenábenlu pa qu’entrara a pacer nos terrenos colindantes.

La desaparición de la facería vien a coincidir cola desamortización, yá que al entregase la propiedá a particulares, munchos de los tarrenos sometíos a esta modalidá, aquellos impidieron el so beneficiu poles comunidaes vecinales.

FILANDONES: una «ocasión de pecáu».

Voz asturiana, del llatín filum (filo). Yeren reuniones de muyeres d’ún o más pueblos, na casa d’un vecín, col oxetu de pasar parte de la nueche filando. Pol gastu de lluz que teníen los dueños de la casa, yera condición obligada que les moces asistentes filasen pa ellos un día a la selmana.

Aurelio de Llano ye, quiciabes, el que meyor describe la lliturxa del filandón: «La fila ye’l sitiu onde s’axunten les vecines pa filar. Sentaes en tayueles, cola rueca na cintura, y la rocada suxeta col adornáu roqueru de pañu, van mesando’l cerru poco a poco colos deos de la manzorga, mentes que colos de la drecha volteen el fusu que retuerce el naciente filu y envuélvenlu alredor hasta completar la pella. Siéntese’l riflar de los mozos que s’arimen a la fila; les moces ufiérten-yos asientu al so llau, y mentes el fusu xira y xira ente los deos de la moza, el galán fala d’amores y a veces, la moza que nun ta empareyada suel entamar les canciones de pique; y dalguna vieya burllona canta, allá al borde del llar::

Filandango voime,
Filandango véngome,
Filandango voime
Na rueca lu tengo».

El rigurosu conceptu de moralidá imperante nos sieglos XVII y XIX determinó que tanto l’autoridá civil como la relixosa llegaran a prohibir los filandones (tamién les esfoyaces) col razonamientu que vien darréu: «Porque en dalgunos sitios hai’l malu y perniciosu vezu d’axuntase peles nueches en cases particulares mozos y moces a lo que llamamos filandones, fogueres y otres semeyantes, de que se siguen munchos perxuicios y pecaos, prohibimos diches xuntes y filandones y mandamos a los nuestros cures que nun les permitan nes sos parroquies».

FOROS: cómo llegar a ser propietariu.

Tiense muncho discutío del so orixe. La opinión más xeneralizada, ye la de que’l foru respuende a una fórmula contractual –especie d’arriendu hereditariu- que posibilitaba’l non desprendese totalmente de la propiedá de tierres incultes y ermes. Tresmitíase asina únicamente’l dominiu útil mediante la percepción d’un preciu inferior al de la utilidá real de la tierra tresmitida, pero conservándose’l dominiu sobre la mesma y, por ello, la posibilidá de recuperar les tierres cuando éstes, yá cultivaes, alquieran col trescursu del tiempu un mayor valor.

Realmente’l foru convertía al colonu en cuasi propietariu, y asina lo evidenciaba’l refrán «El qu’afora, viende», favoreciendo la consolidación de la familia rural a la so dedicación esclusiva de los llabores agrícoles.

La finalidá principal del foru foi, nos sos nicios, el de poner en cultivu les estensísimes superficies ermes en propiedá de los monasterios y de la nobleza p’asina aumentar la riqueza del país y poblar el territoriu, yá que yera obligación esencial nel contratu de foru meyorar les finques.

Dicía Xovellanos que «los antiguos monasterios rompíen y cultivaben por sí dalguna parte de les sos tierres y daben en foru les demás a persones que les derrompieren y les cultivaren. Otru tantu facíen les ilesies y los señores empleaos de contino na guerra. Por esti mediu foi estableciéndose la primer división de les tierres d’Asturies».

El pagu del contratu de foru facíase na modalidá de pensión o canon anual. La pensión del foru facíase,normalmente, n’especie: centén, trigu, escanda, miel, congrios, castañes, mantega, xatos, carneros, quesos salaos, pites, etcétera. El canon en cera yera frecuente pol so consumu na lliturxa de los monasterios.

El contratu de foru empieza la so decadencia a partir del momentu nel qu’aumenta la mano d’obra n’agricultura, yá que a partir d’entós nun se fai necesario ufiertar grandes ventayes a los cultivadores, aumentando notoriamente el canon del contratu, qu’empieza a facese proporcional al valor del tarrén.

Coincidente con esta circunstancia, el réxime d’arrendamientos va desplazando al réxime de los foros y sustetuyéndolu cuasi dafechu.

En tou casu hai que reconocer al foru l’importante papel que desempeñó como pieza integradora de la propiedá rústica que permitió la tresmisión de les caseríes indivises de xeneración en xeneración.

FORU FRUMENTARIU; l’home del sacu.

Recibía’l nome de foru o censu frumentariu la modalidá de contratu en virtú de la cuala’l propietariu que necesitaba perres tresmitía la so finca al prestamista, y esti devolvía-yla en conceptu de foru, reservándose’l drechu a una pensión en frutos como pan, vinu, aceite, lleña, tocín, pites, etcétera.

Denominábense tamién «rentes en sacu», quiciabes porque l’acreedor de tales rentes acudía con un sacu al domiciliu de los deldores pa recoyeles.

GREMIOS: regulando los oficios.

Históricamente nun parez tar claro si son preesistentes los gremios a les cofradíes o viceversa. La opinión más xeneralizada ye la de que l’entecedente inmediatu del gremiu foron les cofradíes, congregaciones d’hermandá, que teníen unes finalidaes relixoses, benéfiques y de socorru.

N’Uviéu esistíen les cofradíes de zpateros, carpinteros, pelliceros y ferradores. La más famosa ensin dulda yera la de los xastres, con unes ordenances onde hai un anticipu de lo qu’anguaño ye la competencia deslleal, al disponer que nengún de los cofrades podía confeccionar la ropa portao por otru, baxo pena dineraria.

Los gremios algamaron un gran desenvolvimientu a finales de la Edá Media y nel so orixe surden pa protexer los intereses del gremiu mediante’l control de la producción y la venta nel ámbitu local, nuna suerte de monopoliu del mercáu.

A los gremios correspuende n’esclusiva alquirir y repartir la materia prima, fixar los precios, les hores de trabayu y los operarios de cada taller, establecer los salarios y controlar la calidá de la producción. Dientro de cada oficiu dixebrábense tres categoríes xerárquicamente ordenaes: el maestru, que yera’l propietariu del taller y de los útiles de trabayu; los oficiales, que trabayaben a sueldu, anque a veces teníen participación nos beneficios, y los deprendizos, que teníen que realizar un períodu de conocimientu del oficiu de dos a cuatro años ensin percibir salariu, al cabu de los cualos ascendíen a la categoría d’oficiales.

Los gremios son, en definitiva, los antecedentes de les actuales asociaciones y colexos profesionales.

GUARIZA: los güés a mano.

Yera costume xeneralizada n’Asturies de cotar ciertos pastos específicos p’alimentar meyor a los gües.