Ignacio Arias Díaz
Lletráu de la Xunta Xeneral del Principáu d'Asturies
Les Noticies, 23-07-00. Pp. 19

Atrás     PDF

L’HORRU: cenciellu, baratu y bien pensáu

El diccionariu de la Real Academia Española de la Llingua defínelu como «edificio de madera, de base rectangular, sostenido en el aire por cuatro o más columnas o pilares llamados pegoyos, en elcual se guardan y preservan de la humedad y de los ratones granos y otros productos agrícolas».

Ye la construcción típica asturiana por escelencia. La so finalidá nun solo yera la de valir de graneru pa conservar les colleches, frutos y semienta a fin de preservalos de la humedá y de los mures, sinón tamién de despensa pa los comestibles de la casa, asina como de guardarropa pa los vistíos de fiesta. Y tamién como vivienda complementaria, como dormitoriu. Dicía Xovellanos que nun se conoz sobre la tierra «un edificiu tan cenciellu, tan baratu y tan bien ideáu, un edificiu que valga al empar de graneru, despensa, palombar, colmenar y dormitoriu, ensin embargu de ser tan pequeñu».

La documentación de la pallabra llatina significando graneru y la noticia de qu’había na Península «graneros de madera sobre columnes» ponnos na pista de que yá había horros na época romana, anque ye a comienzos del sieglu XVI n’España cuando s’empieza a perfilar la idea de que l’horru ye cosa propia de les montañes d’Asturies y Galicia.

Son munchos los autores que s’ocuparon d’escribir sobre l’horru. Destacamos ente ellos a Constantino Cabal, a quien pertenez el pasaxe que vie darréu:

«Anguaño guárdase nel horru la collecha, l’embutíu, el tocín. Nél estiéndense les frutes, suspéndense los xamones, axúntense los sacos de fabes. Un toscu cantarín diz asina, en previsor conseyu aldeanu:

"Mi niña, si vas al horru,
del tocino parte poco:
doce meses tiene el añu
semanes cuarenta y ocho".

Hai quien fai nel horru la vivienda y nos sitios arcaicos, nel horru conserven les mocines espeyu y escarpidor, y nél guarden los luxos (...) y los quesos. El detalle de los quesos recuérdalu un cantar d’estamiente:

"Regaleite con un queixu
en señal de matrimoniu;
el matrimoniu foi nulu,
vólvase’l mieu queixu al horru"».

N’Asturies, la edificación reposa sobre cuatro o seis pilares de columnes de madera o piedra, sigún sía horru o panera. Estes columnes reciben el nome de pegollos y lleguen a tener una altura d’unos dos metros. Los pegollos apóyense sobre los pilpayos, grandes piedres cuadraes pa preservar de la humedá de la tierra a los pegollos. Tamién s’utilicen estes piedres o pilpayos p’aumentar la base d’apoyu y sustentación de los pegollos. Sobre’l pegollu asiéntase una piedra cuadrada o redonda, que sobresal enforma pelos llaos de la columna y recibe’l nome de muela, teniendo la misión d’impedir la subida de los mures. Enriba los pegollos, cubiertos de mueles de piedra, descansa’l graneru de madera; la so base ta formada por cuatro vigues que formen un cuadráu, les trabes o escalones, xuníes por mediu d’ensambladures. Los estremos de les vigues sobresalen al esterior mediu metru o más, y sobre elles, a veces, apoyábense tables, formando una a manera de galería alredol del horru, o bien solo por dalgún de los llaos del mesmu; en dalgunes ocasiones el corredor ta resguardáu pol llamáu mandil, que ye un revestimientu de tables pela parte esterior pa protexer contra la lluvia, cuando cai lladiada. Sobre les vigues llevántense les cuatro paredes o colondres, formaes por anchos y gruesos tablones, colocaos verticalmente.

Cuatro vigues mas delgaes que les d’abaxo –los lliños- colocaes sobre les colondres, valen como soporte pal teyáu. Esti, a cuatro vertientes, descansa sobre otros tantos maderos inclinaos, apoyaos sobre les esquines de la edificación, que xunen en forma de cruz na cima del teyáu. Nel vértiz del teyáu colócase una piedra de forma prismática, a manera de remate, que se denomina la montera l’horru. Estos cuatro maderos sobresalen al esterior del techu mediu metru o más, valiendo de base al ampli pelloviu qu’arrodia al horru.

Na mayor parte d’Asturies, l’horru cúbrese con teya, anque, sigún les zones, tamién se fai con paya o con pizarra negro. Nel horru tradicional nun s’empleen clavos na construcción, recurriendo a la ensambladura por mediu de pieces de madera. Suel dicise que los únicos clavos son los de la cerradura.

Pa subir al horru utilízase una escalera de piedra llamada subidera, que ye como mediu metru más baxa que’l nivel del horru pa evitar que la utilicen los mures. Dende esta escalera accédese a un gran tablón, la tenobia, nel que ta la puerta que conduz al interior del horru.

Del so calter de construcción típica asturiana, asina como de la so importancia, dan fe’l númberu de constructores esistentes n’Asturies que sigún l’últimu censu efectuáu asciende a unes 22.000, si bien hai que tener en cuenta que na ellaboración d’esti censu omitióse la respuesta por parte de dalgunos conceyos importantes, polo que, quiciabes, nun pecamos d’esaxeraos si asitiamos el númberu d’horros, paneres y cabazos esistentes n’Asturies alredol de los 25.000.

PROBLEMES LLEGALES

L’horru nun ye una figura que perteneza al pasáu; tien una gran actualidá dende la óptica qu’ufierten los problemes xurídicos qu’anguaño plantea, y que son de diversa índole.

En primer llugar los derivaos de la propiedá compartida d’horros de parte de varies families, que puede traer causa bien na división de la casería a la qu’inicialmente pertenecía la construcción, bien a que yera más económico agrupase dos o más families pa facer una construcción que facer una cada familia. Sigún la tradición oral, esistía un drechu d’alquisición preferente a favor del titular o titulares de les otres partes en casu de tresmisión onerosa d’una d’elles. Los elementos propios debíen reparase a costa de cada titular; y los comunes a cargu de toos proporcionalmente o a partes iguales.

En segundu llugar, la calificaciópn xurídica de los horros, que va dende la so consideración como cosa mueble, postura esta contenida n’antigua Resolución de la Direición Xeneral de Rexistros de 7 d’agostu de 1863, que partía pa tala calificación de la posibilidá de treslláu o desmonte ensin menoscabu de la estructura, hasta la so calificación como bien inmueble, tesis caltenida na Sentencia de l’Audiencia Provincial d’Uviéu de 28 d’abril de 1966.

En tercer y últimu llugar, l’usu del horru. Una reciente Sentencia de l’Audiencia Provincial d’Asturies entendió que «l’arrendamientu d’una panera nun puede estimase nin como accesoriu del de vivienda, que nun esiste, nin, dende llueu, como aptu pa la realización d’actividaes profesionales, comerciales o industriales».

A partir del Decretu de 22 de febreru de 1973, colóquense baxo la proteición del Estáu los horros o cabazos esistentes n’Asturies y Galicia que tengan una antigüedá non menor d’un sieglu, sía cualquiera l’estáu nel que tean, impidiéndose toa intervención qu’altere’l so calter o pueda provocar el so esbarrumbamientu.