Ignacio Arias Díaz
Lletráu de la Xunta Xeneral del Principáu d'Asturies
Les Noticies, 06-08-00. Pp. 19

Atrás     PDF

MAMPOSTERÍA

Sigún la opinión más xeneralizada, el términu mampostería remanez de manum ponere y significa acción de poder o autoridá pa llantar en terrén ayenu.

Constitúi una variedá de l’aparcería (dir a la parte), y fai referencia al cultivu de la mazana.

En virtú d’esta figura concédese una tierra pa derrompela y depués llantala d’esta fruta, recibiendo xeneralmente’l dueñu la metada de lo que se produza y el llantador la otra metada. Estínguese’l contratu cola muerte del arbolíu, plazu que, por términu mediu, abarca unos trenta años.

Prieto Bances ye de la opinión de qu’esta triba de contratu de plantación a comuña nació, espresa o tácitamente, de la costume esistente n’Asturies pola que les partes demediaben lo llantao a bona fe, y mesmo a mala fe si s’algamaba’l perdón, solucionando d’una forma armónica y equilibrada la pugna ente’l principiu de la propiedá y el principiu de trabayu, ente’l derechu romanu clásicu, que recoyía’l principiu de l’accesión nel dominiu de los árboles y el drechu xermánicu que concibía a árboles y suelos como suxetos diferentes y por ello susceptibles de pertenecer a persones distintes.

Testimonios de la esistencia d’esta figura pueden recoyese en Galicia y tamién en Cataluña, si bien nesta última recibe’l nome de plantación «a rabassa morta», anque’l cultivu yera de recimares y per plazu de cincuenta años.

El contratu de mampostería, gracies al cual s’intensificó n’Asturies el cultivu del mazanar, alcuéntrase anguaño prácticamente estinguíu.

Quiciás ún de los medios d’intensificar la producción del nuesu productu agrícola típicu por escelencia fuera’l restablecimientu d’esta mena de contratu.

MAREA

La marea yera una vieya costume esistente nos puertos de mar asturianos que consistía na obligación del comprador d’acutar pal consumu de los vecinos del pueblu –non pa la reventa- la tercer parte de los comestibles vendíos al por mayor polos estranxeros en puertu, por términu de cuarenta y ocho hores y al mesmu preciu en que los algamara.

Una y bona se surtiera’l pueblu nel que se vendieren talos xéneros podíen beneficiase de les marees los vecinos d’otros llugares del Principáu que concurrieren.

MARMES

Costume xurídica semeyable a les derrotes (la derrota consistía en permitir a tol armentíu del pueblu la entrada en cotos o eríes determinaos onde la propiedá se dividía en parceles, collechaos yá los cereales, pa pastar y aprovechar comunalmente herba y roza), qu’esistió na zona de La Pola de Siero, hasta tiempos rellativamente recientes.

Consistía na obligación de los vecinos del llugar de realizar anualmente la llimpia de sebes y la igua de muries, ciarros y portielles, arróu del derechu al aprovechamientu de los pastos en segándose les faces respectives.

MATRIMONIU

La institución matrimonial rexentábase n’Asturies con calter xeneral poles mesmes lleis que nel restu d’España.

Sicasí, y masque n’Asturies nun esistió un derechu foral propiu, sí essistieron formes xurídiques típicamente asturianes constantemente reafirmaes polos usos consuetudinarios. Nesti aspeutu, merez recordase la institución de «casar una fía pa en casa», ye dicir, pa que ella siga al frente de la facienda familiar. Esta institución tenía ámbitu nel mediu rural y ente families campesines, anque davezu la casería y tierres que se tresmitíen nun yeren de propiedá, sinón d’arrendamientu, y con arreglu a los vezos y costumes nin l’arrendador nin los sos descendientes podíen ser embargaos nin espulsaos. La institución de «casar una fía pa en casa» yera muncho aceptada en toles families; pa ello solíen facese renuncies por parte de los hermanos y, depués de la promulgación del Códigu Civil, toa clas d’escritures y vueltes pa poder tresmitir esta especie de mayorazu popular femenín. Estes formes o costumes que pudieren llamase matriarcales tamién se manifiestan na forma de designar al maríu reduciéndolu a una proposición en xenitivu y un pronome: el de Xuana; el de Carmina.

Otres costumes yá más d’inclín folclóricu que xurídicu, son les que fain referencia a les serenates qu’acompañaben a los matrimonios de xóvenes por parte de los amigos del noviu; a la costume ente los vaqueiros de llevar l’axugal de la novia nún carru al que daba escolta tola vecindá de la braña o del pueblu; y a les lloqueraes qu’acompañaben a los que contrayíen segundes nupcies.

El refraneru popular ta enllén d’amueses alusives al matrimoniu, tanto na etapa prematrimonial como una y bones contrayíu. Asina:

Santina bendita,
dame otru maríu
porque esti que tengo
nun duerme comigo.

A lo que l’esposu arrepostiaba:

Santina bendita
di-y tu que miente,
que duermo con ella
y ella nun me siente.

A delles coples punxéron-yos música:

La Virxen de Cuadonga
tien al pie la fonte clara;
la moza que d’ella bebe
dientro del añu se casa.

MAYORAZU

Ye una institución civil constituyida pol llamamientu d’una familia al gociu perpetuu de determinaos bienes con prohibición de nayenalos –les llamaes tierre muertes-, y usólo enforma la nobleza, en dexando de ser guerrera y faciéndose cortesana, pa caltener el rangu, la preeminencia social y les tradiciones de los sos antepasaos.

L’usu abusivu d’esta institución inmovilizó una gran parte de la propiedá territorial, que truxo como consecuencia’l fomentu de la ociosidá y l’absentismu.

Tolos escritores y políticos de la Ilustración, con Campumanes y Xovellanos de cabezaleros, esprecetaron contra los mayorazos, solicitando la so abolición, circunstancia que s’algamó a mediaos del sieglu XIX.

Con too y con eso, n’Asturies los mayorazos, fundaos la mayor parte sobre propiedaes pequeñes, nun ocasionaron consecuencies negatives pordemás a l’agricultura. Pola cueta, los sos poseedores, los fidalgos, exercieron una sabia tutela sobre la masa campesina.

André Fugier describía los mayorazos, destacando la so parte positiva, como «una mena de nobleza media que constituyía una cadarma social sólida; vivíen nes sos tierres, en casones que llucíen blasones heráldicos nes fachaes; yeren cultos, polo xeneral, y teníen bonos llibros d’autores nacionales y estranxeros, principalmente franceses. Llevaben una vida tan simple como los sos arrendatarios, y exercíen nellos una gran infuyencia. Estos propietarios na Guerra de la Independencia, foron ún de los pegollos más arrechos de la resistencia asturiana».

Los mayorazos habíen desaparecer, porqu’amás d’inxustos, destruyíen el principiu esencial de la propiedá, el del poder dispositivu, pero la política desamortizadora obró prematura y imprevisoramente, y náboliéndolos dexó al campu asturianu ensin una clas dirixente.

MEDEIRU

Ye’l sitiu qu’ocupa la denominada meda o montón de fexes de trigu o centén, que s’apiñen al aire llibre nel tiempu de mayar, apilaes unes sobre otres enriba d’unos maderos que les aisllen del suelu. Amuesa una planta circular y cónica que preserva al trigu de la lluvia. La planta radial suel midir de 2,50 a 3 metros de diámetru, y l’altor llogra los 4 o 5 metros.