Ignacio Arias Díaz
Lletráu de la Xunta Xeneral del Principáu d'Asturies
Les Noticies, 20-08-00. Pp. 20

Atrás     PDF

MOYONES

Son señales estables, ensin forma nin tamañu determináu, utilizaes pa delimitar los llinderos de los caminos, finques y heredaes, al envís d’evitar la confusión coles tierres vecines.

N’Asturies reciben diverses denominaciones: moyones, finxos, marcos, muñones, sebes, sucos, cárcaves, llendes, fitos, doiros, derregos y xantos.

Caún d’ellos tien el so propiu conteníu y significáu. Los fitos, moyones, finxos, marcos o muñones, son, xeneralmente, piedres calices o de regodón, cantos rodaos ensin tamañu determinaú. Baxo ellos, y pa estremalos, pónense como testigos unos trozos de teya qu’aseguren la so certeza como consecuencia de los cultivos.

Les sebes son cercaos vexetales que tienen la doble función de señal y defensa circundado dafechu los terrenos que se quieren guardar; los xantos son llábanes de pizarra qu’enterraes sobresalen hasta l’altor d’un metru y ciarren los llaos de finques que dan sobre camín públicu. Los derregos tienen un pie d’anchor y sitúense nes finques llanes cubriendo la distancia ente marcos, y el llaviegu tien que los respetar escrupulosamente, pues como diz el refrán: «ente marcu y marcu nun hai arcu»; los doiros o sucos son talúes o bancales non cultivaos d’un metru d’anchor ente dos finques de distintu nivel en terrenos pendientes que, al empar qu’eviten los corrimientos de tierres sirven de llende, perteneciendo siempre a la finca del planu superior. Les cárcaves utilizábense pa zarrar los montes, de manera que siguiendo tol perímetru o solo la parte collendante coles otres propiedaes, s’abría una zanxa «caldera» de media vara d’anchor por otro tanto de fondura, y colos tapinos que se sacaben construyíase pela parte interior una muria hasta algamar un altor suficiente.

Sobre’l tema de les llendes esistía la creencia de que yeren coses sagraes que nun se podíen manipular, hasta’l puntu de que se pensaba que’l que mudaba una llende, y más en concreto un marcu o finxu, nun podía descansar nel otru mundu y tenía que volver a la tierra pa restituyilu al so sitiu.

Ello ye prueba evidente del respetu y el calter d’intocables de que gocien estes señales, culquiera que fuera la so manifestación esterna, como prueba definitiva d’identificación del dominiu.

MOLINOS

L’usu del agua siempre tuvo arreyáu a l’actividá del home. Los asentamientos humanos primitivos buscaben la prosimidá de los calces d’agua pa llevar a cabu les sos actividaes. Nostante la rellación del home primitivu col agua yera mui rudimentaria, centrada nes necesidaes de subsistencia y nel bañu como recréu y esfrute, más qu’en sen hixénicu.

Paulatinamente, l’home foi pensando nel agua como fonte d’enerxía, y foi aplicándola en distintes manifestaciones: molienda, confección de texíos y forxa de metales, pero l’usu del agua através d’inxenios mecánicos entama en tiempos del Imperiu Romanu. L’home canaliza l’agua, elévalo mediante sistemes de bombéu penriba del so nivel natural, trespórtalo a sitios que nun lo teníen, y inventa la rueda hidráulica. A partir de la rueda hidráulica remanez el molín.

La configuración xeográfica d’Asturies facilitó’l desarrollu del molín y de la industria que se forma al so redol.

Quiciabes el métodu de molturación más primitivu fuera l’empléu de dos piedres, más o menos dures, planes y pulíes, ente les que se machacaben los cereales hasta consiguir una farina cola testura preciso pa que lo asimile l’organismu. El procesu foi perfeccionando hasta alcanzar un grau de mecanización nel que la fuerza muscular nun yera tan necesaria.

Hubo una época, non apartada, na que, na práctica totalidá de los pueblos d’Asturies esistíen molinos. Anguaño nun ye difícil alcontrar nicios que dan fe de la so importancia, y son numberoses les cases d’aldea que pal usu particular incorporaron molinos eléctricos.

Distínguense tres tipos de molinos: molinos de rabilar, molinos d’agua y molinos de marees.

EL RABIL

Los molinos de rabilar empleábense pal escascarillao de la escanda. Yeren unos mecanismos que se movíen de forma manual por cuatro persones y taben, salvo les mueles de moler, construyíos de madera. Tuvieron una gran importancia puesto que’l cultivu de la escanda taba mui estendíu peles zones montañoses d’Asturies dao que yera un cereal d’iviernu mui resistente al frío.

LA FUERZA HIDRÁULICA

La proliferación de regueros, de los que ye fácil derivar el calce, determinaron una implantación masiva de molinos d’agua. L’agua cáptase per una canal hasta la ñora, depósitu d’agua del que se precipita con gran fuerza pel «cubu» sobre les paletes del rodieznu o turbina faciéndola xirar. El xiru ye tresmitíu a través del exe o árbol a la muela móvil o volandera.

Por aciu d’una serie de mecanismos posteriores moltúrase’l granu y el grosor de la farina regúlase pola variación de la separación ente les dos mueles.

La esplotación de los molinos podía facese de dos maneres: por «veceres» o turnos de tolos propietarios que teníen la propiedá d’un día o de mediu según les necesidaes; o por «maquila», que ye’l pagu que percibe’l dueñu’l molín, consistente en retener la parte proporcional de la cantidá llevada pa moler. El productu de les «maquiles» deposítase nún recipiente de madera. La midida que más s’utiliza ye’l «galipu», equivalente a unos cuatro kilogramos; dos galipos formen un copín; cuatro, un zalamín; y dieciséis una nega.

El cobru de la maquila daba llugar a faladuríes recoyíes nel cancioneru popular:

«La molinera trai corales
y el molineru corbatín
¿d’ónde saldrá tantu luxu
si nun sal del molín?»

o esta otra

«La molinera, trilla, trilla,
la molinera trillará,
la molinera del molín
¡qué bien cuidadina tá!».

PLEAMAR Y BAXAMAR

Los molinos de marees, como’l so propiu nome indica, muévense al aprovechar la fuerza de la cayida d’agua que los desniveles creaos poles marees provoquen. La ubicación d’estos molinos escoyíase buscando un entrante costeru ampliu qu’enllenara cola pleamar y se vaciara na baxamar. Facíase entós una muria de mampostería a mou de dique nel que se colocaba una compuerta abatible, que s’abría a la pleamar y zarraba a la baxamar. Asina consiguíase almacenar una gran cantidá d’agua que s’evacuaba através de les compuertes de los molinos. Encalzábase hacia unes canalizaciones angostes que permitíen que l’agua garrara gran velocidá. Cayía sobre’l rodieznu y facía xirar los mecanismos del molín como ocurre colos molinos de ríu.