Ignacio Arias Díaz
Lletráu de la Xunta Xeneral del Principáu d'Asturies
Les Noticies, 03-09-00. Pp. 20

Atrás     PDF

MONTES

Los montes tienen una importancia extraordinaria n’Asturies, desque tán arreyaos a la nacencia y desarrollu de los nuclios urbanos.

Sin necesidá de retrotraese a tiempos más remotos, puede afirmase qu’entornu al monte surdieron nel so día les Entidaes Locales, antecedente más prósimu n’Asturies de les Parroquies Asturianes actuales.

L’artículu 2 de la Llei del Principáu 11/1986, de 20 de payares, pola que se reconoz la personalidá xurídica de la Parroquia Rural, esixe pa la constatación d’esta la esistencia d’un nucliu vecinal definíu, separáu de los que s’integren nel Conceyu, nel que concurran intereses propios, distintos de los xenerales de la entidá municipal o l’esfrute comunitariu de bienes patrimoniales non municipales, anque nun s’afayen sometíos al réxime de «montes vecinales en mano común». Pero puede afiramase y asina lo constatemos personalmente nos trabayos de campo que perfiximos por cuenta de la Comisión de Drechu Consuetudinariu del Parlamentu Asturianu, que l’elementu que xustifica y da vida a la Parroquia Rural como tal ye, cuasi esclusivamente, la propiedá d’un monte y la so esplotación consiguiente.

Los órganos de gobiernu de la Parroquia Rural tienen a cargu la propiedá del monte y l’aplicación de los beneficios de la esplotación maderera a les necesidaes esclusives de la Parroquia Rural. La interposición de la personalidá xurídica de la Parroquia Rural como entidá inframunicipal evita asina l’efectu de que l’aprovechamientu del monte pol Conceyu se diversifique en nuclios distintos a los que conformen la propia parroquia.

COMUNALES Y VECINALES

Ún de los mayores problemes que se presenten n’Asturies en relación colos montes ye’l de la denominación atendiendo a la vinculación xurídica.

Nel trabayu de campo que desarrollemos hasta agora pudimos comprobar que se fala de montes comunales, propios, patrimoniales, vecinales en mano común, catalogaos y con conveniu, ensin saber mui bien de qué se ta falando. Por ello vamos establecer una tipoloxía mui elemental que nos permita saber en cada casu en presencia de qué clas de monte nos alcontramos.

A los efectos que nos interesen podemos asitiar una primera distinción atendiendo al suxetu propietariu y, asina, en sintonía cola Llei de Montes, podemos estremar ente montes pertenecientes al Estáu, entidaes locales, entidaes públiques o privaes non territoriales y particulares.

Centrándonos nos montes de les entidaes locales podemos distinguir, acordies col Reglamentu de Bienes de les Corporaciones Locales, ente bienes de dominiu públicu y bienes patrimoniales. Dientro de los de dominiu públicu resérvase la denominación de comunales p’aquellos qu’ha d’aprovechar el común de los vecinos, precisando qu’éstos sólo podrán pertenecer a los municipios y a les entidaes locales menores.

Al empar, el Reglamentu mentáu puntualiza que los patrimoniales, a los que tamién denomina «propios», son aquellos que, nun tando destianaos a usu públicu nin afectaos a un serviciu públicu, pueden constituir fonte d’ingresos pal erariu de la entidá.

No que se refier a los montes vecinales en comuña, podemos considerar como talos a los que pertenecen a agrupaciones vecinales en calidá de grupos sociales y non como entidaes alministratives cuando vengan aprovechándose consuetudinariamente polos miembros d’aquelles en condición de vecinos. La so titularidá correspuende ensin asignación de cuotes a los vecinos qu’integren en cada momentu’l grupu comunitariu que se trate, o lo que ye lo mesmo, a los que tengan «casa abierta con fumo».

UTILIDÁ PÚBLICA Y CONVENIU

Dao que la situación del puntu de vista de la titularidá de la propiedá ye la que quedó descrita y, simplificando muncho, nos permite distinguir a los efectos qu’interesen ente montes comunales –propiedá d’una entidá con bas territorial- y montes vecinales en comuña –propiedá d’una agrupación vecinal, non como entidá alministrativa-, ye posible efectuar una clasificación según el mou d’esplotación del monte. Clasificación tala, qu’amuesa gran interés na práctica, posibilita diferenciar, siempre dientro de los montes pertenecientes a una entidá pública, ente montes catalogaos como d’utilidá pública y montes non catalogaos.

La distinción ente unos y otros hai que la fecer según el grau d’intervención del órganu competente n’agricultura pol réxime d’esplotación del monte.

Nos montes catalogaos d’utilidá pública, la entidá propietaria del monte queda obligada a constituyir en calidá de fondu d’ameyora, y a favor del dichu órganu, un 15% del importe de los aprovechamientos de monte pa invertir n’ameyoramientos forestales.

El mesmu criteriu s’aplica a aquellos montes non catalogaos como d’utilidá pública a los que la entidá propietaria somete al réxime de catálogu pola suscripción d’un conveniu col órganu competente en materia d’agricultura.

Nos montes que nun aparecen catalogaos como d’utilidá pública la entidá propietaria dispón de la totalidá del aprovechamientu forestal pa usar del mou más acionáu.

Pero ye que nos trabayos de campo se constató qu’en delles parroquies rurales llamen «propios» a los montes comunales con un términu que, masque abulta antitéticu, fai evidenciar que, siendo’l monte propiedá de la Parroquia Rural, el so aprovechamientu nun ta afectáu a un usu determináu, sinón a lo que disponga en cada intre l’órganu de gobiernu de la Parroquia. Lo que ye lo mesmo: el 15% del aprovechamientu nun ta afectáu al so ingresu y disposición por parte del órganu competente en materia d’agricultura.

BRAVOS, VAREABLES Y INDIVIDUALIZADA

Cabo les clasificaciones mentaes, ye dable distinguir, dientro de lo que se venía denominando «propiedaes a monte y villa» -que ye una especie de propiedá comunitaria con atribución de cuotes y non condicionada a la cualidá de vecinos, sinón hereditaria- ente términos bravos, términos vareables y propiedá individualizada.

Los «términos bravos» yeren estensiones pergrandes de terrenos incultos, con llendes abegoses, formaos por llombes de zona montañosa que pertenecíen a dellos copropietarios por cuotes indivises. Dientro d’ellos enclavábense determinaes finques particulares llamaes «acantaes», esto ye, non zarraes, sinón delimitaes por fitos.

El gociu d’estos términos, suxetu a los pactos que los condóminos alcuerden, nun ta determináu por cuenta de la vecindá o de pertenencia a la collectividá parroquial o municipal, anque la mayoría de los partícipes son vecinos. Talo ye que pueden ser copropietarios vecinos d’otros pueblos y hasta persones estrañes al municipiu onde s’ubiquen. Lo determinante ye ser propietariu, non vecín.

Los «términos vareables» son los mesmos que los bravos, cola diferencia de que, encuenta de ser esfrutaos en comuña, se derrompíen periódicamente cada veinticinco o trenta años, asignándose por mayoría lotes qu’añalmente cultiva cadún de los condóminos en proporción a la so cuota.