gnacio Arias Díaz
Lletráu de la Xunta Xeneral del Principáu d'Asturies
Les Noticies, 17-09-00. Pp. 19

Atrás     PDF

LA PALMADA: una opción de compra

La palmada ye una figura contractual de gran predicamentu n’Asturies, que conserva tola so vixencia. Basta acercase a cualquier feria de ganáu pa comprobar que se sigue calteniendo como fórmula pa cerrar el tratu de venta de ganáu.

La palmada ye l’apretón de manes ente comprador y vendedor pol que se cierra simbólicamente’l tratu o contratu, entendío –y esto ye mui importante polo que más alantre se dirá- como promesa de llealtá nel so cumplimientu.

Quiciabes quien meyor supo plastificar la liturxa de la palmada fora Ramón Prieto Bances, caderalgu que foi d’Historia del derechu na Facultá de Derechu de la Universidá d’Uviéu.

Pa don Ramón la palmada yera la másima espresión del paisanu, de la llealtá, de la seriedá, de la voluntá del home más allá de los papeles.

Al xuiciu d’él, l’home del campu venía a la ciudá a danos una lleción d’honestidá. Pa cerrar un tratu, valía-y con estrechar con fuerza la mano de la otra parte, y esti xestu comprometía de tal manera la so voluntá que se cumplía per cima de too.

Les formalidaes del apretón de manes referíales don Ramón de la manera que vien darréu:

«- Vendo la vaca en siete billetes. (Dicir un billete nos mercaos y feries de ganáu n’Asturies ye dicir mil pesetes).

- Yo doi por ella seis.

- Nun hai tratu.

- ¿Quiés seis quinientes?.

- Ye tuya, venga la mano.

El compraor tiende la mano derecha y el vendedor apriétala cola d’él. Asina agarraos, permanecen unos segundos llevantando y baxando los brazos en llinia vertical con un movimientu bruscu. El vendedor suel acompañar el xestu con estes palabres: ¡Que te preste!. ¡Que floreza!.

El contratu ta concluyíu y los contratantes beben xuntos la robla. N’ocasiones, cuando les partes tarden en llegar a un acuerdu, surde un mediador; sal del grupu de los compañeros o de los mirones que siguen el tratu por simple curiosidá o por enterase de la marcha de los precios:

- ¡Vengan les manes!.

El mediador garra separadamente la mano drecha de cadún.

- Nun son seis nin siete billetes; son seis quinientes. ¿Táis conformes?.

Retírense les manes con repulsa violenta. El mediador fracasó y marcha. Pol contrariu, les manes abandónense nes del mediador; el signu ye espresivu y el mediador xúneles pa que s’estrechen. Depués van toos a beber la robla».

Nin contratos, nin papeles, nin abogaos, nin notarios. Bastaba l’apretón de manes pa sellar y formalizar la operación.

Agora bien, tuvimos ocasión de comprobar nel trabayu de campu desarrolláu nos últimos meses, que la palmada nun ye tanto una fórmula pa sellar o cerrar el tratu, pa entender perfeccionáu’l contratu de compraventa, sinón qu’en realidá ye una especie de contratu con opción de compra, o una especie de contratu suxetu a la condición de que l’oxetu de la compra –la vaca, la oveya, el caballu- tea en perfectes condiciones pal usu al que se va destinar, yá que si nun fora asina, vuélvese sobre’l contratu y revócase o minorízase’l preciu inicialmente alcordáu en función del defectu que padeza l’animal del que se pretende la compraventa.

D’ehí qu’haiga que destacar que l’apretón de manes, que la palmada, va siguida de lo que se denomina rexistru de tratu, que ye una operación llevada a cabu por un rexistrador, esto ye, por una persona esperta conocedora de l’anatomía animal, capaz de detectar cualquier defectu o lesión que sufra l’animal.

Si a resultes del rexistru l’animal padez una lesión o un defectu, pueden ocurrir dos coses: si l’animal se pretende comprar pa tiru y el defectu inflúi de manera decisiva nel rendimientu que d’él s’espera, el comprador puede resolver el contratu; si l’animal se compró pa carne y el defectu que padez ye meramente físicu, ensin qu’afecte a cuestiones rellacionaes cola sanidá, el comprador ta habilitáu pa minorar el preciu inicialmente alcordáu através del apretón de manes. Tamién en determinaes zones esisten matizaciones a lo dicho en función de que l’animal se compre en cuadra o en feria.

Una vez practicáu’l rexistru del contratu, perfecciónase cola entrega y subsiguiente recepción del animal, momentu nel que podemos entender ultimada la compraventa, y polo tanto, del bon fin namás se respondería en casu de que s’amosase la esistencia de vicios ocultos imposibles de detectar através del rexistru de tratu.

Vemos, entós, que la palmada nun constitúi nella mesma una fórmula de perfección del contratu de compraventa, sinón que’l contratu de compraventa de ganáu tien tres fases o momentos distintos: la palmada, qu'’n realidá ye un contratu con opción de compra o una promesa de llealtá nel cumplimientu del contratu; el rexistru de tratu, que ye un esamen del estáu anatómicu y físicu del animal; y la entrega y recepción del animal, que ye l’aceptación de la compraventa, que perfecciona esta modalidá contractual.

PARROQUIA RURAL: nel interés común

Ye la forma tradicional de convivencia y asentamientu de determinaos núcleos de población asturiana, y tien un ámbitu inframunicipal dientro del territoriu de los conceyos.

Asina lo reconoz l’artículu 6 del estatutu d’Autonomía del Principáu d’Asturies, qu’encamienta al conseyu de gobiernu a reconocer la personalidá xurídica de la parroquia rural.

N’execución d’esti mandatu publícase la Llei 11/1986, de 20 de payares, pola que se reconoz la personalidá xurídica de la parroquia rural.

Nella establécense como requisitos de tal reconocimientu los que vienen darréu: la esistencia d’un núcliu vecinal definíu separáu de los que s’integren nel conceyu nel que concurran intereses propios distintos de los xenerales de la entidá municipal; o l’esfrute comunitariu de bienes patrimoniales non municipales anque nun tean sometíos al réxime de montes vecinales en mano común.

A partir de los trabayos de campu que se tán realizando, puede afirmase que ye’l segundu de los requisitos el que normalmente concurre na parroquia rural; la propiedá d’un monte y la so esplotación pa invertir los beneficios de la mesma n’obres d’interés de la parroquia.

Anque ye obvio, convién puntualizar que nada tien que ver la parroquia rural cola parroquia eclesiástica. La parroquia rural, como yá quedó dicho, ye una forma d’asentamientu tradicional de determinaos núclios de población n’Asturies; la parroquia eclesiástica ye la ilesia de referencia de determinaos núclios de población, onde s’efectúen les inscripciones de nacimientu, les de matrimoniu y les de defunción, y suel estender la so xurisdicción a varies parroquies rurales.