escaliu

l'escaliu

El Derechu amuesa l'alma d'una nación
Fermín Canella

El Conceyu d’Estudios Xurídicos L’Escaliu toma’l so nome d’una vieya institución xurídica asturiana documentada yá dende’l sieglu IX, que consistía nel desbrave y cultivu de la tierra ermo. L'Escaliu constitúise como ún de los Grupos de Trabayu del Aconceyamientu de Xuristes pol Asturianu y dende él queremos averanos a la realidá asturiana dende una perspeutiva xurídica, cola vista puesta nel futuru. L’Escaliu quier ser un llugar d’estudiu y alcuentru nel que mecer reflesiones, propuestes ya iniciatives de calter xurídicu; un llugar afayadizu pa la torba d’idees y la concreición d’actuaciones a pequeña escala que, d’acordies coles nueses posibilidaes, seyamos quienes pa camudales en realidaes concretes.

Ente los fines de L’Escaliu atópense:

§	L’estudiu, divulgación ya investigación de los recursos xurídicos d’Asturies, comprendiendo dos estayes: Les Instituciones de Derechu Públicu asturianes y l'afondamientu y afitamientu de l'autonomía política d'Asturies, encontándose pa ello na propia entidá y especificidá xurídico-política del país; mirando d'averase asina a la conocencia la hestoria d'estes Instituciones, la so pervivencia y proyeición; procurando'l so desendolcu y evolución, encadarmando esi estudiu nel sistema d'integración político-alministrativa a nivel estatal, européu ya internacional, teniendo especial procuru d'atender pa la tradicional vocación atlántica asturiana. Les Instituciones de Derechu Civil asturianes y la puesta al día d'elles.
§	La contribución al fomentu y promoción del desendolcu económicu, social y cultural d’Asturies al traviés del estudiu y la propuesta d'implementación de les posibilidaes de les sos instituciones xurídiques.
§	L’aportación de propuestes, opiniones ya iniciatives de calter xurídicu que sirvan al desendolcu económicu, social o cultural d’Asturies.
§	La promoción del diálogu y l’intercambiu d’opiniones al traviés de conceyos y debates de calter xurídicu.